المتهم الثاني في قضية مقتل المذيعة شيماء جمال يفجر مفاجأة من العيار الثقيل
فجر المتهم الثانى فى قضية قتل المذيعة شيماء جمال، مفاجآت جديدة خلال اعترافه فى المشاركة فى الجريمة مع المتهم الثانى القاضى أيمن حجاج المتهم بقتل زوجتة الإعلامية شيماء جمال، كما اعترف خلال التحقيقات بعلاقته بالجريمة التى نفذت فى مزرعة بأبوصير فى البدرشين، حسب ما كشفته أوراق محضر استجوابه من جانب النيابة العامة.
وجاء نص التحقيقات مع المتهم الثانى بقتل المذيعة شيماء جمال، بمشاركة زوجها القاضى أيمن حجاج فى مزرعة أبو صوير بالبدرشين، والتى كشف فيها عن التخطيط لقتلها، وسبب تغيير مكان الجريمة من شقة فى أكتوبر إلى مزرعة بالبدرشين، كما يلى:
س: ما هى علاقتك بزوجته المجنى عليها؟
ج: معرفهاش.
س: ألم يسبق لك رؤيتها؟
ج: عمرى ما شفتها.
س: ما المعلومات التى لديك بشأنها؟
ج: قالى إنه متجوز واحدة عرفى ومقاليش حتى اسمها.
س: ما الذى أخبرك به بشأن علاقتهما الزوجية؟
ج: إن معاملتها وحشة ليه ولسانها طويل وهو عاوز يخلص منها ويطلقها بس خايف تفضحه عند مراته.
س: متى بدأت العلاقة بينهما؟
ج: هو مقاليش متجوزها من إمتى ولا عرفها إزاى.
س: ما هى طبيعة الخلافات التى أخبرك بها؟
ج: مقاليش غير إن معاملتها وحشة ولسانها طويل وعاوز يطلقها.
س: ألم يخبرك متى بدأت تلك الخلافات بينهما؟
ج: لأ هو مقاليش حاجة.
س: ماذا كان ردك عليه؟
ج: أنا قولتله ماشى بس هنعمل كده إزاى وفين، فرد عليا وقالى إن عنده شقة فى أكتوبر وواخدها إيجار وممكن ناخدها فيها.
س: لماذا وافقته؟
ج: كنت متعشم بالمصلحة اللى هتطلع من الموضوع اللى كان قالى عليه وكان واعدنى بعد ما قفل موضوع الراجل المستثمر إنه هيجيب مصلحة كويسة تخص شغله فكنت عاوز أعمل معاه جميلة علشان آخد مصلحة من وراه.
س: ما الاتفاق الذى تم بينكما؟
ج: إننا هناخدها شقة زوجها «أيمن» اللى قالى إنه مأجرها فى أكتوبر على أساس إنها ملكه وهيبيعهالها، وبعدين نكتفها ونخليها تمضى على إيصالات أمانة وتتنازل عن حقوقها.
س: ما هى الإجراءات التى اتخذتها فى سبيل تنفيذ ذلك المخطط؟
ج: هو قالى تعالى أوريك الشقة وهنشوف هنعمل إيه فرحت معاه بس لما شفت الشقة قولتله لأ متنفعش.
س: متى كان ذلك؟
ج: تقريبا يوم 27 أو 28 مايو.
س: أين توجد تلك العين؟
ج: هى فى أكتوبر بس مش فاكر عنوانها.
س: ملك من؟
ج: هو قالى إنه مأجرها.
س: ما هى وسيلة انتقالكما لها؟
ج: كنا رايحين بالعربية بتاعته الشيفروليه السودا.
س: وما سبب رفضك تنفيذ المخطط بداخل تلك العين؟
ج: علشان لقيت إن الشقة دور أرضى ومكشوفة للجيران فمينفعش يتعمل فيها أى حاجة.
س: ما الذى قررته تحديدا؟
ج: قلت له الشقة مكشوفة وأى حاجة هتبان وهيشفونا وإحنا داخلين وخارجين معاها.
س: إذن ما التصرف الذى بدر منكما آنذاك؟
ج: ساعتها نزلنا من الشقة وخدنا العربية ومشينا فقولتله مينفعش نعمل كده فى شقة زى دى فقالى طيب إنت شايف إيه ناخد فيلا فى مكان محدوف عشان محدش يشوفنا، وبعدين راح قايلى طالما هناخد فيلا ما تيجى نخلص منها خالص، فتفاجأت بكلامه وقولتله إزاى؟، قالى ملكش دعوة بحاجة أنا اللى هعمل كل حاجة بس عاوزك تساعدنى فى إخفاء جثتها، فأنا قولتله إحنا كده عاوزين فيلا فيها أرض كبيرة او مزرعة علشان ندفن فيها الجثة فقالى خلاص دور على المزرعة أو فيلا وابعتلى على واتساب.
س: ما تفصيلات الاتفاق الذى تم بينكما آنذاك؟
ج: لما قالى بقولك إيه طالما هنجيب فيلا ما نخلص منها فأنا قولتله إزاى فقالى إنت ملكش دعوة بحاجة أنا اللى هنفذ وأنت هتساعدنى فى إخفاء جثتها، فأنا قولتله يبقى نجيب فيلا بأرض كبيرة أو مزرعة عشان نقدر نخفى جثتها فيها، واتفقنا إنى هدور على مزرعة فيها أرض كبيرة وهقوله علشان يأجرها.
س: متى تحديدا تولدت فكرة قتل المجنى عليها لدى المتهم أيمن؟
ج: الكلام ده لما نزلنا من الشقة وإحنا راكبين العربية قالى طالما هنجيب فيلا ما نخلص منها.
س: ما الذى كان يقصده بعبارة «ما نخلص منها»؟
ج: يعنى يقتلها.
س: ما سبب تولد فكرة القتل لدى المتهم؟
ج: أنا سألته ليه عاوز تقتلها فساعتها قالى إن فيه ورق مهم معاها ولازم آخده منها والورق ده مهددانى بيه وممكن يضيعنى.
س: ما هى تلك الأوراق والمستندات؟
ج: هو قالى إنه ساعات كان بيستعين بيها وبيخليها تروح تخلص مع الناس وتاخد منهم فلوس فى شغل تبعه وإن معاها مستندات بالكلام ده.
س: ما باعث المتهم على التفكير فى قتل المجنى عليها؟
ج: عشان كانت بتهدده كتير بالورق اللى معاها.
تهديد بالمستندات
س: ما الذى أبلغه لك بشأن تهديد المجنى عليها له؟
ج: قال إن معاها ورق وكانت بتهدده وبتقوله إنها هتروح الشغل عنده وتوريهم الورق ده وتفضحه وتوديه فى داهية وكانت عاوزة منه 3 مليون جنيه عشان متروحش شغله وتفضحه بالورق ده ويطلقوا من غير شوشرة.
س: ألم يكن فى إمكان المتهم التحصل على تلك المستندات دون قتل المجنى عليها؟
ج: هو قالى إنه هيقتلها وهيروح ياخد الورق ده من عندها فى البيت، وإن عندها خزنة فى البيت بس مقاليش حاطة الورق ده فى الخزنة ولا لأ.
س: وما الذى حال دون تحصله على تلك المستندات دون اللجوء لقتل المجنى عليها؟
ج: اللى أنا فهمته إنه كان قلقان منها تاخد الفلوس وتديله الورق ويكون معاها نسخة تانية من الورق وتفضل مهدداه طول حياته، عشان كده كان عاوز يخلص منها خالص وينهى القصة.
