«هشوف أكل عيشي».. تفاصيل خلاف أفشة مع نجم أهلاوي كبير

كشف أحمد شوبير نجم الأهلي السابق، تفاصيل خلافه مع محمد مجدي أفشة لاعب الفريق الأول لكرة القدم بالأحمر، بسبب الجراحة التي خضع لها مؤخرًا.

وخضع أفشة لعملية جراحية خلال الأيام الماضية، بعدما منحه الجهاز الفني راحة من التدريبات لنهاية الموسم الجاري.

وقال شوبير في تصريحات إذاعية: "إمبارح أفشة كلمني، وقالي ياكابتن أنا كان ليا عتاب عندك، لأنك قولت إني تأخرت في العملية".

وتابع: "أنا حابب أوضحلك، انا كان عندي فتق يمين قبل ما آجي الأهلى وعملته، وبعدها جالي الفتق الشمال، وبلعب بقالي 5 شهور وأنا بتقطع ومقدرش أقول للنادي لأ عشان الظروف اللي فيها".

وواصل: "وبقالي 3 سنين مخدتش أجازة، فقلت آخد أجازة 15 يوم وبعدين أعمل العملية، وده اللي حصل، وهفك السلك اليوم الاثنين، وأبدأ الجري من بكرة بشكل عادي".

وعن العروض التي تلقاها اللاعب، أوضح: "أفشة قالي إن فيه عرض تركي بالفعل، ولسه وكيله بيتناقش فيه مع الأهلي، بس لو النادي رفض، قالي بالنص: مقدرش أقول للأهلي لأ، أنا كنت عندك في برنامجك، وقولتلك حلمي أني ألعب في الأهلي، لكن لو الأهلي وافق، يبقى لازم أشوف أكل عيشي".

واختتم: "أفشة قالي أبويا بيخاصمني لما الأهلي بيخسر، وبيكون يوم نكد علينا كلنا، ولمّح إنه ممكن يكون في تمديد تعاقد لعقده مع الأهلي الفترة الجاية".