«قالي بابا حبيبي».. مرتضى منصور يكشف مفاجآت في لقائه مع كهربا
كشف مرتضى منصور رئيس الزمالك، كواليس لقاءه الأخير بمحمود عبد المنعم كهربا لاعب الأهلي، بعد عقوبة الإيقاف التي تعرض لها، بسبب رحيله عن القلعة البيضاء.
وقال رئيس الزمالك في تصريحات تلفزيونية: "كنت معدي بالعربية لاقيت حد بينادي عليا بابا حبيبي، لاقيت أنه كهربا وقالي إزيك يا بابا يا حبيبي، قولتله أهلا وسهلًا".
وتابع: "لو السماء انطبقت على الأرض هتدفع الـ50 مليون والعداد شغال يا كهربا، أنا في المواقف الإنسانية ممكن أتنازل، إنما فلوس النادي والدولة لا يمكن".
وواصل: :أنا بشكرك على كلامك بابا وحبيبي، لكن انت سيبت بابا، وروحت لجوز ماما، لما قالك تعالى أهربك، وبعد العقوبة جوز ماما خاف وقال معرفكش".
وأوضح: "عدلي القيعي قال إحنا ملناش دعوة بكهربا، يعني هو صحي من النوم قال عايز ألعب في الأهلي، دا كان معانا منور وراح المنتخب واحترف في السعودية وأخد 100 مليون جنيه".
وواصل تصريحاته موجهًا حديثه لمسؤولي الأهلي: "انتوا اللي ورطوا كهربا، ادفعوا الفلوس علشان مستقبله، دا من أحسن اللاعبين في مصر، وخلى كهربا يطلع يقول مين حرضه على الهروب من الزمالك انت دلوقتي بتغرق وهتبطل كورة".
واختتم مرتضى منصور تصريحاته: "كهربا من أحسن اللاعبين في مصر وانتم من قمتم بتوريطه، وأنصحه بالخروج والاعتراف على من قام بتحريضه حتى لا يغرق".
