أمن القاهرة يفحص منشور متداول عن تعذيب أطفال دار أيتام بالتجمع الخامس
تجري أجهزة الأمن بالقاهرة بقيادة اللواء أشرف الجندي، مدير أمن القاهرة، واللواء محمد عبد الله، مدير مباحث العاصمة، فحص منشور متداول عبر مواقع التواصل الإجتماعي عن تعذيب أطفال دار أيتام بمنطقة التجمع الخامس.
ويقوم رجال المباحث بعمل التحريات للوقوف على ملابسات الواقعة واتخاذ الإجراءات القانونية اللازمة حيالها.
وكان رواد مواقع التواصل الاجتماعي "فيسبوك" تداولوا منشور مفاده اكتشاف مشرفي حضانة أطفال آثار تعذيب على جسد طفل أثناء ذهابة للحضانة.
وجاء في المنشور:
«طيب ده ضهر طفل عمره 5 سنين.. يرضيكم كده طيب.. ده طفل بيروح حضانه في التجمع الخامس زي أي طفل.. الحضانة اكتشفت الآثار دي علي ضهره ولما سألوا الطفل قال لهم إن دي آثار ضرب بتوكة الحزام».
وتابع: «الحضانة بيروح لهم أكثر من طفل من نفس الدار.. ولما اتكلموا معاهم اكتشفوا أن كلهم بيتم ضربهم بالمنظر ده وعليهم آثار تعذيب برضو وفي منهم طفل مش بيتكلم اصلا لأن لسانه فيه عيب خلقي، ده غير أن طفل فيهم بيقول إن في مشرف بيمسكه من أماكن حساسة بالليل وفي الحمام».
وأشار المنشور: «الحضانة اتصدمت، وقررت تبلغ الدار وتروح بنفسها لمقر الدار في التجمع، واللي بتقوله كارثي.. بيقولوا لها معلش هو شاطر مع الكبار فهنرجعه للكبار تاني.. ونجيب غيره للصغيرين ! وأن الاطفال إللي بتروح الحضانه من أطفال الدار مجرد ما حد يقرب منهم أوي يرفعوا إيدهم يخبوا وشهم وكإنهم متعودين على الضرب في كل وقت ومن كل الناس.. وعشان كده خايفين طول الوقت».
وتابع: «طيب روايات الأطفال دي واللي بيحصل فيهم نفهم منه إيه.. نفهم منه إن في كارثة في إدارة هذه الدار يستاهلوا يتحاسبوا من صغيرهم لكبيرهم.. وبما إن الآثار واضحه كده فأكيد الدار عارفه إللي بيحصل للأطفال، لأنهم أكيد بيغيروا للآطفال والآثار واضحه جدا.. وكمان نفهم إن في إهمال من وزارة التضامن الاجتماعي في الرقابه على هذه الدار وغيرها، و نفهم كمان إن قانون العقوبات تجاه الأيتام لازم يتغير.. لازم العقوبه يتم تغليظها.. عشان العقاب يكون رادع لأن إللي بيعملوا كده في أيتام معتمدين علي أن دي أيتام مش بتتكلم!».
