شهيرة: «حياتي مش مظبوطة بعد محمود ياسين وباخد مهدئ علشان أنام ومش عارفة أرجع للجمهور بإيه»
طلت الفنانة شهيرة على جمهورها بعد فترة غياب طويلة من خلال برنامج كلام الناس مع ياسمين عز.
وقالت شهيرة خلال الحلقة: «مش عارفة بعد السنين الطويلة دي هقدم إيه للجمهور، هل هقدم حاجة يقولولي لأ ياريتك ما عملتيها ما إنتي كنتي قاعدة وإحنا حابينك كده؟ أنا مترددة».
وتابعت: «هناك عروض تأتي لي وأنا ببقى متحمسة جدًا وقتها، ولكن لما بفكر وأقول طب والورق، أهم حاجة الورق لأني بقالي فترة طويلة أوي مطلتش على الناس بأي دراما أنا عرفت إن المناخ والمهنة بقت صعبة وبيشتغلوا بالـ 18 ساعة، وعلى أيامنا كان 8 ساعات حاجة كده بشياكة وحلوين أوي وبنبقى واعيين باللي بنعمله، مش بنعمل نص دورنا وإحنا تعبانين، دايمًا عمرو ابني بيقولي والله يا مامي ما هتقدري، ده شيء مرهق جدًا، الدلع اللي كنتي بتدلعيه زمان مش هتلاقيه دلوقتي».
وأضافت: «ممكن لو جاتلي حاجة واو أتحمل وأنزل، مش قادرة أتجاوز وفاة محمود ياسين لحد دلوقتي، محمود ما يتعوضش كزوج وإنسان مفقتدة حاجة كبيرة أوي في حياتي أنا مش مظبوطة ومحطمة، كل صحابي بيقولوا لي لازم تخرجي من الحالة وأني واحشة الناس، ولازم أبقى قوية شوية لأني ساعات بكون محطمة».
واستكملت: «كل يوم بالليل بنادي على محمود ياسين، وبيتهيألي إنه بيرد عليا، حتى أثناء مرضه كنت أنده عليه ويرد عليا، وللأسف مش عارفة أتخلص من العادة دي، أنا مكنتش أعرف إني هبقى كده وفي الحالة دي، أنا متفاجأة من نفسي، مع إن كان عندنا مقدمات لرحيله في فترة مرضه، ولما حصل ورحل، كأن مكنش فيه أي مقدمات، ساعات باخد مهدئ علشان أنام».
