خناقة وضرب في حفل تخرج طلبة إعلام.. وجامعة القاهرة: «منعرفش حاجة»
اشتعلت مواقع السوشيال ميديا، بالخبر الذي تم تداوله بين رواد وسائل التواصل الاجتماعي حول ما تعرض له خريجو كلية الإعلام جامعة القاهرة من سوء تنظيم لحفلة التخرج الخاصة بهم، التي كانت في منأي تمامًا عن أي تدخل من الكلية في تنظيمها، وأسفرت عن ضياع فرحة عمرهم باختتام مسيرتهم التعليمية بمشاجرة.
وكشف أحد خريجي كلية الإعلام ما حدث بحفلة التخرج «كان المفروض الساعة 3 يبدأ التكريم وبدأنا ندور على الوشاح وروب التكريم عشان نبدأ نجهز والمشكلة، في ناس ملقيتش الوشاح بتاعها، وبدأت الناس اللي هناك واللي المفروض منظمين الحفلة تتكلم معانا بأسلوب غير لائق»، مضيقًا: «سألنا عن المسؤول عن تنظيم الحفلة عشان نحل مشكلة الوشاح بدأوا يتهربوا ويقولوا الحاجة لسه هتيجي وفضلنا ساعتين مستنيين ومفيش حاجة جت».
وتابع: «بعد مرور ساعتين بدأت الأهالي تدور على المسؤول عن التنظيم ومفيش حد بيرد علينا لحد ما لقينا المسؤول عن تنظيم الحفلة من دفعتنا والناس كلها نزلت عليه ضرب وحاليًا موجود في المستشفى، واكتشفنا أن الشركة المسئولة عن التنظيم شركة وهمية وملهاش وجود وصاحبها نصاب».
وأكد أن الأهالي توجهوا إلى قسم أبوالنمرس المتواجد بالجيزة، وتقدموا ببلاغ للحصول على أموالهم، وتم القبض على صاحب الشركة الوهمية وهو الآن متواجد بالقسم للعرض على النيابة.
واضافت أحد الطالبات «أول ما روحنا الحفلة كان في أغاني بس وملقناش الاستيدج اللي هنتكرم عليه ولا الأوشحة، لحد ما قالوا إن مفيش أوشحة ودا بيكون حاجة مميزة للناس اللي هتاخد درع، وإحنا اللى روحنا ندور على شهادتنا عند بتوع الديجي».
وتابعت: «الحفلة اتحولت في ثواني لخناقة في شارع وفي ناس اتعورت وطلعنا على القسم عملنا محضر عشان الناس تاخد فلوسها وكلنا كتبنا اسمنا عشان يجيبولنا فلوسنا وقبضوا على صاحب الشركة وهو دلوقتي في القسم»، مضيفًة: «كنا بنرقص وفجأة الموضوع قلب عزا.. حسبي الله كسروا فرحتنا وفرحة أهلنا».
بيان جماعة القاهرة
جاء أول رد رسمي من كلية الإعلام جامعة القاهرة بأنها ليس لديها أي صلة بما حدث لخريجي الكلية، وأن الأمر كان خارجًا تمامًا عن تنظيمها، وجاء نص بيان الكلية، كالتالي:
«تعلن كلية الإعلام أنها لم تقم بتنظيم أي حفل لخريجي دفعة 2021/2022 نهائيًا سواء داخل أروقة الكلية أو خارجها، كما أن إدارة الكلية لم تحط علما بالحفل الذي أقامه بعض الخريجين خارج نطاق الكلية أو الجامعة ودون أي تنسيق مع أي مسؤول على أي مستوى، وتهيب إدارة الكلية بالخريجين عدم المشاركة في حفلات تخرج خارج الإطار الجامعي، ونود الإشارة إلى أن الكلية كانت بصدد الإعداد والتنسيق لإقامة حفل تخرج يتلاءم ومكانة أبنائنا الخريجين جار التخطيط له حاليًا».
