بـ 30 جنيها.. تامر حسني يدشن مبادرة لعلاج مرضى ضمور العضلات الشوكي

نشر الفنان تامر حسني، صورة لأحد الأطفال مصابي مرض ضمور العضلات، وحث جمهوره على المساهمة في علاج هذا المرض، كمبادرة منه.

وكتب تامر حسني، عبر انستجرام: «يا جماعه مرض ضمور العضلات منتشر جداً في عصرنا ده ربنا يعافي الجميع تخيلوا لو مليون واحد بس من عدد سكان بلدنا العظيمة لو دفع ٣٠ جنيها بس هيساهم في احياء طفلة في لحظة واحدة طفلة بتتعذب كل لحظة هي و اهلها ،، امنية حياتي والله العظيم دلوقت ، يتعمل ابليكيشن تحت رعاية الدولة وتتسمى ((المليون اخ)) وتبقى على تليفونات الناس اللي هتتبرع مليون واحد هتجيلهم رسالة حسب خطورة المرض و نوعه و تكلفته العامة و المطلوب منه وفي سيستم يقدر يدخل بنفسه يشوف اسمه وتبرعه راح فين وإن المريض اتعالج خلاص وتجيله رسالة شكراً صدقتك احيت نفسا بل اسرة كاملة .. انا كفنان جاهز لأي جهة هتتبنى الفكرة دي اني اكون داعم ليها و معلن عنها لو الجهة محتاجة ليا شخصياً أو لصوتي ان شالله أنزل ألم التبرعات بنفسي و اخبط على بيت بيت و ده لوجه الله و لخدمة شعبنا و اهالينا المحتاجين».

وتابع تامر حسني: «اللي هيشترك مره هيدفع ١٠ جنيه … مره خمسه …. مره ٣٠ اقصى حاجه ٤٠ جنيها لأن حقنة علاج المرض ده بـ ٤٠ مليونا و دي اغلى حاجه تخيلوا لما ب ٤٠ جنيها بس تنقذ روح بني آدم يعني هتدفع صدقه و هتنقذ روح و انت في بيتك و الصدقه فيها اجر عظيم تحمي نفسك بيها تحمي ولادك و كل اللي بتحبهم و تبقى صدقه جاريه في كل حياتك …. قيمة الصدقه عند ربنا كبيره اوي اوي فوق ما تتخيلوا يا جماعة متتخيلوش بتشيل عننا حاجات صعبه قد ايه لو عرفناها هنبكي فرحاً من رحمة ربنا … يارب حد يسمعني».

واختتم تامر حسني: «وكدا باذن الله مش هيكون في مريض محتاج .. و لو عندنا مشاكل كتير في مجتمعنا آدينا بوحدتنا و بحبنا لبعض بنشيل مشكلة منهم».