نشوى مصطفى تستعيد مع جمهورها موقفا إنسانيا للراحل هشام سليم

تذكرت الفنانة نشوى مصطفى مع جمهورها أمنية للفنان الراحل هشام سليم قبل وفاته.

وكتبت نشوى مصطفى على حسابها بموقع التواصل الاجتماعي فيس بوك: "افتكرت حاجة عن هشام سليم يمكن مش كتير يعرفوها، في يوم راجعة من التصوير، وكان فيها أستاذة ممثلة كبيرة الله يرحمها اسمها ثريا إبراهيم، قالت لي نشوى معنديش عربية توصليني في طريقك لأقرب مكان انزل أخد تاكسى — قلت لها تاكسي إزاي هوصل حضرتك لباب البيت".

وتابعت: "واحنا ماشيين قالت لي عارفة الشقة اللي حتوصلينى ليها دي مين جابهالي، قلت لها مين، قالت لي شيريهان، وحكت لي إنها كانت بتشتغل معاها مسرحية شارع محمد علي، وكانت بتيجي كل يوم من طنطا للقاهرة، وترجع تاني لأن بيتها كان هناك، ولما شريهان عرفت قالت لها شوفي الشقة اللي تحبيها وأنا اشتريهالك، ولما اشترتها كانت فرحانة".

واستكملت: "هشام سليم عرف بارك لها وقال لها فرشتيها، ولا لسه قالت له فرشتها قال لها كان نفسى أفرشهالك قالت له، وهى بتهزر طيب ما تعمل حاجة تانية قال لها تحت أمرك، قالت له نفسى أحج.. تاني يوم لقيت شركة سياحة بتكلمها، وبلغتها إن هشام دفع كامل التكلفة وكانت خمسين ألف جنيه وكمان وهى رايحة عطاها مصروف الرحلة وقال لها ادعى لي بس كده.. ألف رحمة ونور".