ياسمين صبري: محمود عبد العزيز نصحني نصيحة مهمة.. وحظي كان حلو
تضمنت حلقة برنامج صاحبة السعادة مع الفنانة ياسمين صبري العديد من الأسئلة والإجابات حول مسلسلاتها وتجاربها وطريقة حياتها وموقفها من الشائعات التي تلاحقها كل فترة.
ومن ضمن تصريحات الفنانة ياسمين صبري كانت عن نصيحة الفنان الكبير الراحل محمود عبد العزيز لها، فقالت قابلت الفنان الكبير الراحل الاستاذ محمود عبد العزيز في مسلسل " جبل الحلال" وكان أول مسلسل لي وهو كان الله يرحمه أستاذ كبير وإنسان راقي ومحترم ويحتوي كل من حوله وكان تلقائي جدا، وكان بيقعد يتكلم معايا ويعاملني زي بنته، ففي وقتها كنت في بداياتي وقالي وقتها يابنتي إنتي إيه اللي جايبك هنا مش هتنجحي في التمثيل لكن ممكن تنجحي في مجالات تانية، لكن أنا اشتغلت على نفسي كتير ومازالت بشتغل عليها وبطور منها وبتعلم، لأني شايفة إن الإنسان لازم يعيش عمره كله يتعلم ويطور من نفسه.
و تابعت: "لكن الله يرحمه الأستاذ محمود عبد العزيز نصحني نصيحة ثمينه جدا وكأنه شايف المستقبل، قال لي خلي بالك كويس جدا من الدايرة اللي حواليكي، هما دول الناس اللي بيوقعوا، وأنا كان حظي حلو أن فيه ناس اتحطت في حياتي إدتني مفاتيح من بدري وأنا دايما فاكراها".
