صرخة سيدة في محكمة الأسرة: «جوزي بيبعت صوري للرجالة على الفيسبوك»
محاكم الأسرة مليئة بالكثير من المشاكل، قررت سيدة رفع دعوى طلاق للضرر على زوجها، وتقف في حالة حزن وكسرة.
قالت السيدة أمام القاضي: «جوزي خدعني وباع شرفي، كان عامل واحدة ست وبيكلم الرجالة على الفيسبوك ويبعتلهم صوري».
وتابعت حديثها: «جوزي كان شغال سواق، وفي يوم عمل حادثة كبيرة، ةالعربية كانت صعب تتصلح، وظروفنا ساءت المادية، وقعد في البيت وعندنا ولد وبنت، فقررت أنزل اشتغل عشان أوفرلهم حياة كريمة».
واستكملت: «وكنت بقوله انزل اشتغل كان بيقولي معرفش اشتغل غير سواق، وكل ما اكلمه في موضوع الشغل يرفض، وفي يوم كنت ماسكة تليفونه، وبقلب في الصور لقيت صور ليا وأنا نايمة ولابسة خفيف وصور تانية بدون ملابس، ودخلت على الفيسبوك بتاعه لقيت صفحة باسمي».
وأوضحت: «ولقيت محادثات بينه وبين رجالة وبيبعت صوري ليهم، واكتشفت كمان أنه كان بيكلم واحدة وبيتفق معها أنها تعمل تسجيلات مخلة بصوتها عشان يبعتها للرجالة دي».
واختتمت: «ولما وجهته قالي لو مش عاجبك روحي على بيت أبوكي وأجيب واحدة غيرك وتتصور بمزاجها، وعلشان كدة جيت المحكمة أعمل دعوى».
