هند عاكف: سلمى أبو ضيف كانت لابسة فستان مستفز وفيه إثارة وبطلب من حسين فهمي ينتقي المدعوين

كشفت الفنانة هند عاكف تفاصيل أزمتها الاي حدثت خلال افتتاح مهرجان القاهرة السينمائي في دورته الأخيرة، كما تحدثت عن فساتينها المختلفة في المهرجانات الفنية.

وقالت الفنانة هند عاكف: "أنا بلبس حاجات غريبة بس مبأذيش حد علشان أبقى بخالف الدريس كود والدريس كود على عيني وعلى راسي بس لو اتبعتلي دعوة واتطلب مني عدم مخالفته".

وأضافت: "لكن أنا جيت ليه تحرجوني والمهرجان ده لو مهرجان خاص لو قطعتي رقبتي ما كنتش روحت من غير دعوة لكن ده مهرجان بلدي دي مش حفلة واللي حصل معايا ده إساءة وماكنش يجب إنه يحدث أبدًا، وبطالب أستاذ حسين فهمي لازم ينتقى الكشف بتاع المدعوين ومين الناس اللي تستحق وعلى رأسهم الفنانين وبعد كده أي حد تاني".

وتابعت: "ولو هما مرضيوش يبعتولي دعوة علشان لبسي ففي ناس كتير كانت لابسة فساتين كتير مستفزة وفيها إثارة والشارع مش بيحبها منهم الفنانة سلمى أبو ضيف وهبة السيسي وأكتر من حد تاني والبلوجر بيروحوا علشان يتصوروا على الريد كاربت مش علشان شغل لكن أنا بحضر الأفلام علشان أتعلم لغاية النهاردة".