«فين الرحمة؟».. مرتضى منصور يهاجم جماهير الزمالك بسبب هذا اللاعب

تحدث مرتضى منصور رئيس مجلس إدارة نادي الزمالك، عن قرار زكريا الوردي لاعب الفريق الأول لكرة القدم، بفسخ تعاقده مع القلعة البيضاء بالتراضي.

وقال مرتضى منصور في فيديو عبر قناته على موقع "يوتيوب": "‎زكريا لاعب كبير ولعب بمركز غير مركزه لأنه عنده دم وذوق ومتربي، وفي شوية من المدعيين على نادي الزمالك، زي ما طفشوا محمود علاء ويوسف أوباما، عملوا كدة مع الوردي".

وواصل: "‎كل يوم كان فيه جلد ذات، وكأن الوردي عدوهم، لكن أنا بقولهم مش هتدمروا الفريق، في صفحات مأجورة بتهاجم زكريا، و‎اللاعب قال لي أنا مش هقدر أكمل مع الزمالك رغم أنه من أحرف اللاعبين".

وكشف: "أمير مرتضى بيحاول معاه من أسبوع أو 10 أيام ولكنه بيرفض وعايز يمشي، واللي عملوا كدة من زملكاوية، محمود علاء الهداف التاريخي بين كل مدافعي الزمالك، وبسبب لعبة في نهائي إفريقيا بقى في هجوم عليه، مفيش لاعب مش بيغلط، فين الرحمة؟، انتوا بتدمروا الفريق".

وأكد مرتضى منصور تصريحاته: "جمهور الزمالك بيقول إن الوردي فاشل، وهو بيشارك في مركز غير مركزه، لكن أنا بقوله زكريا أنت مكسب لأي نادي".

واختتم مرتضى منصور: "‎زكريا الوردي تنازل عن عقده، ورجع كل الفلوس اللي أخدها من الزمالك، وأحنا نشكره ونتمنى له كل التوفيق".