عمرو أديب يحذر من كارثة: «كدا الخرم هيغرقنا كلنا» فيديو
عبر الإعلامي عمرو أديب، عن غضبه مما وصفه بتدهور جودة السلع رغم ارتفاع أسعارها، قائلا: "أنا بحيي كل ست تقف في السوبر ماركت وترجع البضاعة اللي مش جيدة".
وأضاف أديب، خلال حلقة اليوم من برنامجه "الحكاية" المذاع عبر فضائية "إم بي سي مصر"، مخاطباً المواطنين: "كل مواطن لازم ياخد حقه، خلاص الناس مش مستحملين ياخدوا سلع بجودة مش كويسة، كفاية ارتفاع الأسعار".
وتابع: "المواطن من حقه يدور على مكان أرخص يشتري منه ومش من حقك كتاجر تعاقبه اقتصاديا بسلع غير جيدة، معقبا:"سعر البترول بينزل الدنيا مش هتفضل كده، إذا كان سعر البترول بيقل يبقى وارد كل حاجة سعرها يقل".
وواصل حديثه للتجار:" الناس خلاص مش مستحملة، ومفيش طاقة إنك تضغط تاني على الناس، خلاص كلنا في مركب واحدة واللي هيعمل خرم في المركب هنغرق كلنا".
وأكمل أديب رسالته للتجار المحتكرين :"متكسروش السوق، ما أنتم ياما كسبتم، تعالو معانا شوية، لازم الوضع دا يتحسن مش هنفضل كدا كتير".
وأردف: "الناس قللت استخدامها من اللحوم، هتعمل إيه تاني، مينفعش يوم ما أجيب لحمة تطلع وحشة وما تتاكلش، خلاص بقى محدش ياكل لحمة تاني".
وأردف:"المواطن بيشتري كرتونة البيض يلاقي فيها بيض بايظ.. وبيض صغير ، بتجيبوا البيض الصغير دا منين وبتعرضوه ليه للناس ورفعتوا الأسعار ليه ومفيش جودة في السلع المعروضة".
