إلهام شاهين: لو فيه رجل دين بيقول آراء متعصبة لازم الدولة تمنع ظهوره على الشاشات

حضرت الفنانة إلهام شاهين لقاء "نحو مواطنة داعمة للتنوع الثقافي"، الذي ينظمه منتدى حوار الثقافات بالهيئة القبطية الإنجيلية للخدمات الاجتماعية.

وقالت إلهام شاهين خلال اللقاء: "شرف ليا إني أكون موجودة في وسط هذه الباقة العظيمة من رجال الدين المسيحي ورجال البرلمان والسياسة والنقد، وشيء عظيم أن فئات عديدة تجتمع على شيء عظيم لأن جميعنا ضد التعصب وعاوزين ننشر هذه الثقافة العظيمة".

وتابعت: "عشان نمنع التعصب لازم نتكلم بصراحة، ليه عندنا التعصب، وتكون الدولة بكل قوتها ضد التعصب، ولو في شخص من رجال الدين بيظهر على الشاشات وبيقول آراء متعصبة نمنع ظهوره على الشاشات، ونقفل صفحاتهم عل السوشيال ميديا".

وتابعت: "طول عمرنا عايشين مع بعض بروح واحدة، وبعض الآراء بتكون تجاوز عن الديانات الأخرى، وعيب تتقال على الشاشات، إحنا شعوب ترفض التعصب إحنا طول عمرنا نسيج واحد".

واستكمات: "وفيه شيخ عنده عنصرية ضد المرأة ويقول إيه يعني زوجك يضربك بعد ما شاف عورتك لسه هتقولي ليه يضربك.. هل ده كلام محترم يقال على الشاشات؟..ده شخص مريض".

وختمت كلامها: "ربنا جميل ولا يمكن تكون دي آراء الدين، لو دي آراء الدين إحنا ازاي هنحترم الدين".