خالد عليش: بقعد مع بنتي ”زي المسجون”

اشتكى الإعلامي خالد عليش، طليقته ، متهما إياها بحرمانه من رؤية ابنته ، قائلا: "من شهر مايو اللي فات وأنا كسبان قضية رؤية بنتي".

وأضاف عليش، عبر حسابه الشخصي بموقع "فيسبوك": "المفروض إني اشوف بنتي ١١ ساعة في الأسبوع وبالتالي أقدر أخدها وأخرجها زي ما كان الاتفاق اللي تم وقت الانفصال واللي على أساسه بدفع المبالغ المالية المطلوبة مني".

وتابع: "بالمناسبة أنا كنت بشوفها فعلا أول كم شهر بعد الانفصال زي الاتفاق ولكن فجأة بدأت حجج كتير لمنعي ومنع أهلي واضطريت، أطلب حقي بالقانون مش غاوي بهدلة".

وواصل: "من وقت الحكم في شهر مايو اللي فات وبعت بطرق غير رسمية ورسمية أطلب إني أنسق عشان آجي أخدها وافسحها وأرجعها ومفيش فايدة".

وأكمل: "لجأت لطرق قانونية تثبت عدم رؤيتي والنهارده خدت حكم جديد بتغريمها مبلغ مالي لعدم تنفيذها الحكم .. حكم كل معناه إني أب بيدفع اللي عليه واللي متفق عليه ومحروم من بنته برضه!".

وأردف: "ولحد دلوقتي مستغرب جدا إن في حد موافق ان أم تمنع أب عن رؤية طفلة وتكون بتتشرط عليه وتمسكه من إيده اللي بتوجعه ويتسقفلها كمان".

وأضاف: "ومتعجب جدا إن في أم بترفع استئناف وتقاتل عشان تمنع حكم بيقول إن بنتها تستمتع بباباها، ويخرجها ويفسحها ومصممة إنه ينفذ رؤية قانونية فقط ويقعد معاها ساعتين زي المسجون في مكان مقفول".

واختتم: "آخر حاجتين كنت اتمناهم في حياتي إن أنا وأم بنتي نقف في المحاكم قدام بعض وإن بنتي تعيش أحلى أيام طفولتها محرومة من فسح و حنان أبوها، ولسه عندي استعداد للحلول الودية بدون ابتزاز أو استغلال".