«عيون محمود وحواجب مصطفى».. ياسمين عز تناشد المطاعم بإضافة أطباق حلويات بأسماء الرجال

ناشدت الإعلامية ياسمين عز، أصحاب المطاعم بإضافة "طبق حلويات الفرعون" ضمن "المنيو" الخاص بالأكلات.

وخلال تقديمها برنامج "كلام الناس" المذاع اليوم الجمعة، على فضائية "إم بي سي مصر"، أوضحت "عز"، أنها استيقظت صباحًا واعتزمت مناشدة كل الفراعين أصحاب المطاعم في مصر.

وتابعت: "أخدتي بالك يا مدام، إن الفرعون بتاعك أو ما يدخل المطعم ويفتح المنيو ويكون شارد ومهموم وحاسس بحزن وآلم، هل فكرتي تسأليه مالك يافرعوني؟، عمرك وانتي بتفكري في طبق المشاوي والفتة واللي هتطلبيه وتشفطيه وخلاص لكن الراجل زعلان ليه مش هتفكري في كدا".

وأوضحت أن سبب حُزن الرجل نظرًا لعدم تواجد اسمه في قائمة الحلويات، وتابعت: "ازاي الراجل اللي برطمان العسل مصدر الحلى ومصنع السكر والمادة الخام لصناعة الحلويات، كيف لا يجد اسمه في قائمة الحلويات بالمنيو؟ شىء آليم وموجع".

وتابعت: "حتى أنواع الحلويات كلها عنصرية، مفيش ولا حتة حلويات باسم الراجل كلها بأسماء ستات، زي: أم علي وغزل البنات ومهلبية وبسبوسة، مفيش حلويات باسم الراجل ليه ميكونش عندنا طبق حلويات اسمه أبو أحمد زي أم علي أو صوابع زينب، طبق باسم عيون محمود، حواجب مصطفى، وغزل الفرعون".

واستطردت: "لابد من أن يكون على الحلويات الرئيسية طبق باسم الفرعون الصغير والفرعون الكبير وعلبة مشكل".

وخاطب أصحاب المطاعم: "أرجو منكم إضافة أطباق باسم طبق الفرعون الصغير وآخر للفرعون الكبير وأنا متبرعه ليكم بحقوق الملكية".