شوبير: «الأهلي دخل الدوامة بإيده.. وهيصعد في حالة واحدة»
علق الإعلامي أحمد شوبير، على تعادل الفريق الأول لكرة القدم بالنادي الأهلي الأهلي مع صن داونز، في المباراة التي جمعتهما ضمن منافسات دوري أبطال إفريقيا.
وقال شوبير في تصريحات إذاعية عبر برنامج "مع شوبير" المذاع على "راديو أون": "اللي حصل للنادي الأهلي صدمة، هو مخسرش، ولكن كان قدامه يكسب، وأضعف موقفه بإيده في المجموعة، اللي المنافسة فيها صعبة".
وأضاف: "شفنا التشكيل والأداء، يعني بيرسي تاو لعب في مركز المهاجم، والحقيقة أنا عندي وجهة نظر ممكن تشرك تاو في المركز ده لو معنكش، لكن الدنيا حلوة وعندك كهربا ومحمد شريف وشادي حسين، وشفنا إن الشكل اتغير الشوط الثاني لما كهربا لعب مهاجم".
وأوضح: "الأهلي تقريبا مظهرش منه حد كويس غير مروان عطية وحسين الشحات ومحمد عبد المنعم ومحمد الشناوي، غير كدا مفيش بصراحة".
وشدد: "الأهلي دخل نفسه في دوامة ملهاش أي لازمة على الاطلاق، المباراة كانت في إيدك وأهدرت فرصة بشكل غريب جدا، وكمان التشكيل كان غريب بصراحة وكان قادر على الظهور بشكل أفضل من كدا".
واختتم شوبير تصريحاته: "الأهلي محتاج يفوز على القطن الكاميروني في القاهرة، وبعدها يفوز خارج ملعبه على صن داونز، في جنوب إفريقيا، وبعد كدا يفوز على الهلال في القاهرة، ونقول مبروك عليه، ولكن غير كدا صعب جدا، ولو مكسبش في جنوب إفريقيا الأمور هتتصعب بشدة".
