زوجة الفيشاوي تهاجم محمد رمضان: «ماتقرفناش وادفع اللي عليك»

أثارت زوجة الفنان أحمد الفيشاوي نادية الكامل جدل كبير بعدما دخلت في مواجهة مع الفنان محمد رمضان على خلفية أزمته الأخيرة مع مصمم أزياء شهير.

وخرج منذ فترة مصمم الأزياء أشرف فجلة بتصريحات محرجة لمحمد رمضان، مؤكدًا على عدم حصوله على مستحقاته المالية.

وتحدثت نادية الكامل عن هذه الأزمة، حيث نشرت على حسابها الشخصي على موقع التواصل الاجتماعي «فيس بوك» منشور كتبت فيه: «ما تدفع يا نجم تمن الهدوم اللي خدتها.. وخليت مدير أعمالك مايردش على الراجل الترزي سنتين ولما جه عندك عاملوه بطريقة بايخة، كنت ادفع أحسن من الفضيحة دي، ادفع تمن الـ4 سديري والـ3 بدل».

وأضافت: «والا هو كل شوية فالح بس تقولنا وغنيتهالنا كمان أن كل هدومك فيرساتشي فيرساتشي وأنت بتقلدهم ومخيط نص هدومك عند الترزية وفاكرنا عبط ومنعرفش الأصلي من المضروب، ماتقرفناش كل شوية تجيبلك هدمتين أو حد يدهوملك هدية من اللي طال عمره على شوية من الترزي وتطلع علينا.. VERSACE نفسه مش كل هدوموا فيرساتشي يا خايب.. من فضلك يا نجم البس في صمت وادفع اللي عليك.. ورجاء أخير ياريت تنطق كلمة VERSACE صح».

ومن جانبه قال مصمم الأزياء فجلة في تصريحات سابقة له: «أنا كنت اتعاملت مع حضرتك من حوالي سنتين، أول تعامل بينا كاوا بالطو، وكان هدية مني لحضرتك، ونزلت ساعتها بوست وشكرت فيّ، وبتشجعني إني أتعامل مع حضرتك، وهيكون في شغل كتير بينا، بعد كده فصلت 3 بدل لحضرتك، وقولتك قيس الأول بعدين نتحاسب، وبعد ما قيست ركبت عربيتك ومشيت، واستنيك تكلمني بعدها عشان تحاسبني».

وأضاف: «بعد كده عملت 4 صداري، واحد منهم طلع بيه في أغنية مافيا، واحد تاني طلع بيه في أول حفلة ليه في الساحل الشمالي».