شذى تفتح النار على حسن شاكوش بعد ظهوره في برنامج ”العراف”

ردت الفنانة شذى، على تصريحات الفنان الشعبى حسن شاكوش عنها، أثناء حواره مع الإعلامية بسمة وهبة فى برنامج "العراف"، على قناة المحور، على حسابها الشخصى بموقع التواصل الاجتماعى "فيسبوك".

وعلقت شذى فى منشور لها: "طب إنت مستفز يا شكشك بدل كلمة مستفز بتعصبك ودكتورة بسمة وهبة علشان هى ست شيك قالتلك شذى فنانة زميلة علشان تجبر بخاطرك بس الحقيقه إنت لا فنان ولا زميل بالنسبالى خالص إنت مؤدى، وبالنسبالى صوتك مزعج، إنما فنان زميل دى أنا اعترض عليها بشدة ودى الحقيقة بس علشان دكتورة بسمة مؤدبة وانت ضيفها مقلتلكش الحقيقة".

وتابعت شذى: "وأصلا مينفعش تسأل مين دى مش علشان لازم تكون عارفنى، بينى وبينك اريح لو متعرفنيش وتعمل الشويتين بتوع ااااااه عارف اسمها ومش عارف أغانيها، ومال شكلها اتغير كده ليه وجو 3 ورقات ده لأن الرد موجود، ما أنا لو محدش فاكرنى ولا عرفنى مش هيجيبوا كلامى ويعرضهولك يا جاهل".

وأضافت: "وأصلا أسماء الأغانى اللى أدإنت قولتها دى تتكتب على تكاتك متعملش فيها بيتهوفن والنبى، ومش معنى إن فى هيصة الفترة دى على اللون ده إن إنت واللى زيك صناع المزيكا فى مصر، أبدا والله إنتوا فاضحنا فى العالم كله بردائة المزيكا اللى بتقدموها".

وعقبت كاتبة: "وعموما وعمليا ردك ملهوش دعوة خالص بالسؤال ولا فهمت منك حاجة، ومش عيب إنك تحضر قبل الحلقه عفوى وعلى طبيعتك دى لما تكون قاعد على مصطبه أو واثق فى ردودك الذكيه المنطقية اللى هى مش موجوده أصلا، ف إبقى حضر بعد إذنك علشان بدوخ المذيعين معاك.. ملحوظه الجاكت اللى كنت لابسه حريمى يا فنان".

وجاء ذلك بعدما علم أن الفنانة شذى تنتقد طريقة حديثه، حيت وصفته بأنه لا يجيد الحديث، فقال: "هى بتغنى؟! هى دى مغنية؟! بتغنى إيه؟! معرفهاش والله العظيم، أنت حافظة لها أغانى؟!".

وتابع شاكوش: «ربنا يتولاها، أنا مش مستفز زى ما هى بتقول، أنا بتكلم بطبيعتى، لكن أنا مبغلطش، ومش بحب أكون FAKE».