تامر حسني يكشف لجمهوره سر نجاحه
شارك الفنان تامر حسني جمهوره بمنشور جديد على حسابه الشخصي بموقع التواصل الاجتماعي فيس بوك.
وكتب تامر: "نهار جميل و ليله عظيمه ان شاء الله اتمنى انكم بعد البوست ده يتغير مفهومكم شويه عن التأثر بكلام الناس المحبط و المهين ان كانوا اصحابك او اقرب الناس ليك او من شرور السوشيال ميديا".
وتابع: "عارف ان في كتير منكم او معظمكم بتأثر فيه التعليقات السلبيه … هتكلم من خلال تجربتي الشخصيه بما اني شخصيه عامه و معرض اكتر منكم للموضوع ده .. في بداية حياتي كنت بتاثر لو حتى من تعليق واحد سلبي لدرجة ان دموعي ممكن تنزل من زعلي و افضل اقول هو انا زعلت الانسان ده في حاجه عشان يشتم بالجحود ده لو كان نقد هقبله اكيد بس دي شتيمه ليا و لأهلي وتجريح وسخريه غير مبرره … المهم ادركت ان احنا بعد ظهور السوشيال ميديا ((بقينا في عصر اي حد ممكن يقول اي حاجه على اي حد )) يعني عصر فتن وبالتالي اللي الكاره هيصدق عشان عايز يصدق واللي بيحبك هيدافع لانه رافض يصدق والشخص الطبيعي الحيادي هيبحث في الأمر ويعقلها بعقله وبقلبه وهيوصل للصح".
وأضاف: "ملحوظه .. اكيد مقصدش حد مش كويس كل افعاله مش كويسه و زعلان من كلام الناس .. كلامي على اللي حاسس انه مايستاهلش كده … الزمن ده في موضه اسمها التنمر والتجريح والاهانه علناً وبلا رحمه وللاسف ناس كتير بقت بتحب تخرج الشر اللي جواها في الحقد والكراهيه والتريقه عشان يرتاحوا ويحسوا انهم سفهوا وقللوا من فُلان عشان يحسوا انهم احسن منه ويعرفوا ياخدوا نفسهم .. دول بقوا كتير لدرجة انها بقت عادة نميمه و غيبه و بهتان للبشر وعاده يوميه كمان وهما مش واخدين بالهم عشان النفس الأماره بالسوء والشيطان بيزينلهم العاده دي ويخليهم يحطوها تحت مسمى ( يا عم احنا بنهزر و بنضحك شويه ) لا لا لا نهزر عشان نضحك من غير ما نئذي مشاعر حد تمام بس هنهزر عشان نوصّل روح انها تتئذي وتُحبط وتتكسر وجايز ضعاف منهم يئذوا نفسهم ويفكروا في الانتحار و تقولي بهزر لا لا لاااااااااا. انت متعرفش هزارك او تنمرك على حد بيعمل في نفسيته ايه وهو رايح بيته أو وهو لوحده حتى لو ضحك معاك وقتها و مبينلكش".
واستكمل: "لو انت مش واخد بالك من كده عادي خد بالك دلوقتي محدش اتولد فاهم وواعي لكل حاجه اكيد بنغلط وبنتعلم … المهم ان كلام الناس السلبي المؤذي في ناس بيحوشوا من خلاله ذنوب ملهاش حصر والناس اللي بيتغلط في حقها بتحوش بيه حسنات وبيتشال من عليهم ذنوب ملهاش حصر ((الحل)) يا تخليك في حالك وتبص في ورقتك بس - يا تعود نفسك ان ميطلعش منك غير كل ماهو خير - او ياعم لو مضطر اوي تنظّر وهتموت لو منظّرتش خليك ناقد حيادي".
واستطرد ة: "وخد بالك ((في فرق كبير بين انك ناقد وحاقد)) و ده بيبان في كلامك وانفعالاتك من غير ما تحس بس اللي حواليك بيحسوك فوراً .. فخلونا احسن نختار اننا نبقى من اللي بيحوشوا حسنات واللي مركزين في حالهم وباصين في ورقتهم او الحياديين لو هينقدوا يقولوا كلام منطقي يتفهم .. عشان تهون على نفسك … دايماً افتكر ان الرُسل نفسهم مسلموش من الاشاعات وكلام الناس .. لما كبرت اخذت عهد على نفسي واقسمت بالله انفذه ((كل ما حد هيجرّح فيا … هاخد قرار نجاح جديد)) ولو انا دلوقتي عندي اكتر من موهبه وبسببها اخدت جوايز عالميه وحققت بيها نجاح اعرفوا ان كل ده كان طموح وتحدي واراده من فولاذ وأحد اهم الاسباب جوايا هو كتر التحطيم والطوب والحروب وادركت حاجه مهمه اوي اني ((مش هقدر اوقف ألسنة الناس بس اقدر اقفل ودني)) واقدر كمان اسمّع ودني كل خير و كل ايجابي استمد منه طاقه رهيبه اكمل بيها عمري وانجح بيها والاصعب انك تتعلم ان لو فلتت كلمه سلبيه من حد زعلتك تاخذها تحولها لوقود حرق (بنزين) تخليك تعلى اكتر يعني تتضرب بالحجاره تاخدها تلمها وتعمل بيها برج عالي تقف عليه ساعتها هتوصّل اللي حاربك وغلط فيك واهانك انه يندم لانه كان عايز يحطمك فا انت استخدمته بمخك وحولته لوقود يعني كان جاي يضرك فادك، المهم عقلك يبقى قوي ويتعامل كده مع المواقف .. يارب كلامي يوصل لكل متابعيني وغير متابعيني لاني بوصل حاجه تخص كل الناس من واقع تجربه حقيقيه اتمنى من قلبي تفيد كل اللي هيقراها نهاركم ابيض".
