«بيضحك علينا ولازم يمشي».. رضا عبد العال يهاجم أوسوريو بعد خسارة الزمالك

أكد رضا عبد العال لاعب الأهلي السابق، أن استمرار الكولومبي خوان كارلوس أوسوريو في تدريب الزمالك، سيدفع الفريق من سيئ لأسوأ، ولا بد من رحيله.

وقال رضا عبد العال في تصريحات تليفزيونيه ببرنامج "البريمو" عبر قناة "Ten": "الزمالك مع أوسوريو من سيئ لأسوأ، الله يكون في عون جماهير الزمالك، كده كده إيدك والأرض من اللعيبة حتى زيزو بيشحت كرة، والمدرب في التوهان وفالح بياكل لبان وقاعد على الدكة، هما راميين الفوطة، ولازم المدرب يمشي".

وتابع: "أوسوريو بطل كدب، انت بتلعب بطريقه غلط لو جبت حد من جمهور الزمالك كان عمل تشكيل أحسن من منك، وبتألف وبتلعب بدون باك رايت وعبد المجيد ديفيندر وهو مبيعرفش يباصي".

وشدد عبد العال: "انت بتضيع شيكابالا وتاريخه بلعبه كل المباراة، ده يلعب 10 دقائق أو ربع ساعه، أوسوريو بيضحك علينا".

واختتم: "يحمد ربنا إنه مراحش السوبر كان وقتها لعب زيزو مكان صبحي، بيلعب نداي باك رايت ليه؟ إيه الميزة، هو عمل سمك لبن تمر هندي".