هاني شاكر عن «ويجز»: مش هحاسب حد عايز يغدي النونة لكن همنع الكلام الخارج
تطرق الفنان هاني شاكر نقيب الموسيقيين خلال استضافته بأحد البرامج لأزمة منعه لمؤدي المهرجانات الشعبية، وسماحه لمطربي الراب بالعمل.
وأوضح هاني شاكر الأمر قائلًا: «الراب فن جديد شبابي أنا واحد من الناس مبفهموش ومبسمعوش، مش معنى كده إني أرفضه أو مشجعش مغنيه، ومعنديش فكرة عن الراب والتراب».
وتابع: «هناك أغاني لويجز من كام سنة، فمتجبليش أغاني من سنتين تلاتة، ويجز مبقالوش 6 أو 7 شهور في النقابة، ولو الكلام ده في حاجة خارجة هيتوقف، هشوف كلام الأغنية كله مكتوب الأول، ولو طلع فيها كلام خارج هيترفض وهننذر ولو اتكرر هيتوقف».
وأضاف: «أنا اللي يهمني هو بيغني صح ومفيش نشاز، هو في كلام هايف ومعرفش إزاي الشباب بيربطوا كلام الراب ببعضه، واللي يهمني أن ميكونش في كلام خارج وأنه يكون بيسف، أنا مش هحاسب أنه عايز يأكل النونة، ولكن هحاسب اللي عايز يقول كلام خارج، وأنا مقدرش أمنع اللون ده ولكن أقدر أمنع اللي مش عضو في نقابة».
