جيهان قمري كاشفةً أسرار ابتعادها عن الوسط الفني: ”مش مزيفة وبديك في وشك”

كشفت الفنانة جيهان قمري، سبب اختفائها وابتعادها عن التمثيل خلال السنوات الماضية، وقلة عروض الأعمال عليها من قٍبل المنتجين.

وقالت جيهان قمري، خلال لقائها مع الإعلامية مروة صبري ببرنامجها "قعدة ستات" الذي يذاع على شاشة "القاهرة اليوم": "أنا بتعامل على أني برا الوسط الفني فعلا عشان أنا براه بقالي سنين، معملتش دراما من 4 سنين، واشتغلت مسرح مع الفنان محمد صبحي من سنتين".

وتابعت جيهان قمري: "مش عارفة ليه مبيتعرضش عليا أدوار أو المنتجين يكلموني، وبستغرب الناس اللي بتكلمني تقولي إيه ده أنتِ هنا؟، بقولهم ما أنا هنا عايشة في مصر هكون عايشة فين".

واستكملت جيهان قمري كاشفة سبب ابتعادها عن الوسط الفني، قائلة: "عشان أنا مش مزيفة، ومبعرفش أقول لحد أنت حلو وحبيبي وأخده بالحضن، ومعرفش أقول لحد أنت عامل حاجة حلوة من ورا قلبي، شخصية صريحة وبديك في وشك زي ما بيقولوا".

وواصلت: "بقالي 20 سنة في الوسط الفني عمري ما زعلت حد، بخلص شغلي وبمشي على طول"، مؤكدة: "جيهان قمري الممثلة انتهت في الاستوديو".

وأشارت جيهان قمري إلى أن لديها جميع أرقام الفنانين ولكنها لم تتصل يومًا بأحد لطلب عمل، قائلة: "عمري ما اتصلت بحد وطلبت منه شغل، الفن دلوقتي كله شللية وكل شلة بتشتغل مع بعض على طول، وفي ناس بتعمل أدوار صغيرة وبتظهر في كذا عمل، ولكن أنا معرفش أعمل ده لأني مش كده، ودايما طول عمري المخرج أو المؤلف اللي بيشوفوني في الدور بيبعتولي".