إبراهيم عمران: شيرين عبد الوهاب مكنتش بتعرف تمثل وعلا غانم كانت من المجاميع
كشف الريجسير ورئيس جمعية الكومبارسات إبراهيم عمران، عن كواليس اكتشافه للفنانة جيهان نصر في بداية مشوارها الفني: "كنت بعمل فيلم اسمه زيارة السيد الرئيس مع الفنان محمود عبد العزيز وهياتم وحسن الأسمر، وجالي محمد راضي قالي عايز بنت شكلها جميل وفلاحة وتطلع مرات حسن الأسمر ووشها مصري".
أضاف عمران، خلال حواره مع الإعلامية إنجي هشام في برنامج المنسي عبر قناة "هي": احنا زمان كنا بنمشي بشنطة فيها أجندة العناوين والصور وبكون عارف خط سير الممثل وأعرف اجيبه من تحت الأرض، فطلعت الشنطة وقلتله اختار الصور وعينه وقعت على جيهان نصر، فقولتله برافو عليك البنت دي جميلة جدا قالي عايز أشوفها، قومت روحت لأبوها البيت وكانت بتعمل اعلانات ومرضيش في البداية قولتله دي فرصة ومش هتتعوض وأقنعته.
تابع: جت جيهان وعملها كاستينج واقتنع بيها وعملت البطولة بـ ٣٠٠٠ جنيه، وكمان في فيلم "البطل " كنت بعمل الفيلم ده.
كما كشف عن الفنانين المشاهير الذيي شهد على بداية مشوارهم الفني، قائلا: "علا غانم كانت من ضمن المجاميع، كمان حنان شوقي كانت من المجاميع وكانت بتجتهد لحد ما بقت نجمة".
وأضاف: "محمد هنيدي كان بيطلع في أدوار صامتة وكنت بكلمه على تليفون الجيران، أما شيرين عبد الوهاب في أول ظهور لها في فيلم ميدو مشاكل مكنتش بتعرف تمثل وكان معايا".
