لأول مرة.. الريجسير إبراهيم عمران يكشف كواليس عن عمر الشريف بفيلم حسن ومرقص

كشف الريجسير ورئيس جمعية الكومبارسات إبراهيم عمران، عن مواقف جمعته بالراحلين هند رستم وعمر الشريف، قائلا: الجيل اللي ميعرفش هند رستم بقولهم دي مارلين مونرو مصر، مرة بعتني ليها الأستاذ يوسف شاهين ابعتلها دعوة ودخلت بقولها دي دعوة من استاذ يوسف قالتلي أهلا باللي من ريحة الغالين ودخلت بيتها واتكلمت معاها، وسألتني أول حاجه و قالتلي الناس اللي ورا الكاميرا اخبارهم إيه، قالتلي لولا الناس دي مكنتش هكون موجودة، إيه الجمال ده؟.

وأضاف عمران، خلال حواره مع الإعلامية إنجي هشام في برنامج المنسي عبر قناة "هي": كنت مرة بعمل فيلم حسن ومرقص مع عادل إمام وعمر الشريف، ورامي إمام عمل بريك في مشهد كبير كان فيه مجهود وأنا كنت واقف يسيطر على المجاميع، وطلبت كرسي لـ عمر الشريف قالي لا يا عم إبراهيم لما الناس كلها تقعد أنا هبقى أقعد.

وتحدث عن حياته مع المخرج يوسف شاهين، قائلا: يوسف شاهين كان عنده النجم زي الكومبارس زي المجاميع كلنا عيلة واحدة وبناكل في طبق واحد.