حفيد محمود ياسين: جدي كان بيتهاجم على الموضة زمان

كشف الفنان الشاب محمود ياسين "جونيور" عن رأيه في ظاهرة القميص الشفاف والموضة الجديدة التي اجتاحت الوسط الفني مؤخرا، وذلك خلال لقاءه مع رؤيا مصر في أحد الحفلات الكبرى التي أقيمت مؤخرا.

وخلال اللقاء كشف محمود عن رأيه قائلا: "أنا بشوف إن الجمهور لما بيحب شخص بيبقى عايزه يبقى شبهه ولما بيشوفه بيعمل حاجة مختلفة بيتضايق".

وفي تصريحاته أكد جونيور، أن بعض الفنانين يتعمدوا ذلك أحيانا بغرض الاختلاف قائلا: "فيه فنانين وأنا ممكن أحتاج لده بيبقى عاوز يعمل ستايل لنفسه لأن الشخصية اللي بتطلع بيها دي في حفلة مثلا مش شخصيتك الحقيقية، لكن بتكون مواكبة للحالة وساعات مبيفرقش معاهم دة إيجابي ولا سلبي، لكن أنا بيفرق معايا ويهمني الناس متتضايقش ومتفهم الآراء السلبية لحاجة زي دي".

وأكد محمود ياسين جونيور أيضا أن انتقادات الجمهور لموضة الفنانين المختلفة واجهها في السبعينات الفنان الكبير الراحل محمود ياسين قائلا: "أنا جدي في السبعينات كان بيلبس الموضة ساعتها وكانت الأجيال الأكبر منه مستغربة ده وبيقولوا إيه السوالف والقمصان والبنطلونات دي، وكل فترة ليها الستايل بتاعها وبرضه هتلاقي ناس بتنتقدها وده بيحصل دلوقتي لما بلبس شبه جيلي هتلاقي جيل أكبر مني بينتقدني".

وعن ظهوره مؤخرا مع النجم عمرو دياب بقميص شفاف مشابه لقميص الهضبة قال: "الموضوع جه صدفة ودي حاجة تبسطني إني لابس زيه لكن بحترم انتقادات الناس وبتقبلها ولو حسيت إني لابس أو قلت حاجة معجبتش الجمهور بكون حريص مكررهاش تاني".

وشارك مؤخرا محمود ياسين جونيور في مسلسل الكتيبة ١٠١ في رمضان الماضي، والذي دارت أحداثه حول "الكتيبة 101" التابعة للقوات المسلحة المصرية، وكيف نجحت في التصدي للهجمات الإرهابية في محافظة شمال سيناء.