أحمد فهيم: عملة نادرة كان محطة مهمة جدًا في مشواري الفني

كشف الفنان أحمد فهيم تفاصيل مشاركته في مسلسل "عملة نادرة"، والحديث عن تفاصيل شخصيته التي جسدها خلال أحداث العمل.

وقال أحمد فهيم خلال لقائه مع المذيعة نورهان عبد الفتاح، في برنامج "زووم ونص"، المذاع عبر شاشة قناة "هي": معنديش مشكلة أعمل دور صغير، إحنا بنعمل فن مش في سباق علشان نثبت لنفسنا أي حاجة، أنا طول الوقت بكافح علشان أعمل الفن والحاجة اللي نفسي أعملها، مش فكرة إني حققت نجومية ووصلت لمكان معين إني أقول مش هعمل ده، أنا هعمل الحاجة اللي ترضيني حتى لو مشهد واحد، معنديش حسابات بعد كده إني أقعد واختار.

واستكمل: طبعًا في حاجات متتعملش وتترفض ولكن أنا معنديش مشكلة في المساحات، وفي مقولة كده بتقول “متعرفش أي لقمة في الرغيف هتشبعك” فمش عارفين أي باب اللي هيتفتح وهننفذ من جواه، والمهم إننا نتقن العمل والإخلاص وربنا هيكرم.

وأوضح أحمد فهيم، أنه لا يلتفت للنقد، قائلًا: النقد بالنسبة ليا مبلتفتش ليه ولا بقف عنده، أنا بعمل شغلي بإتقان وحب وجهد وده اللي وصل للناس، ولو في حاجة معجبتش الناس في شخصية المعلم بسبوسة بمسلسل عملة نادرة، أنا بتأسف وبوعدهم هقدم الأحسن، والمهم نرضي كل الناس، والحمد لله ده مسلسل عملة نادرة وكان محطة مهمة جدًا في مشواري.

وأضاف: كان تحد كبير ليا إن مع شخصية سيد في جعفر العمدة، أعمل شخصية تانية على النقيد تمامًا، وده أثر عليا نفسيًا وكنت بتعافى من الشخصيات لغاية قريب، كنت قاعد في البيت لوحدي 3 أشهر مبشوفش حد من أهلي ولا أصحابي ومركز في الشخصيات اللي بعملها، وإني أفصل بين الشخصيتين كان بياخد مجهود ذهني وعصبي.