«مخدرات وفلوس».. سر مقتل سوداني وحرق جثته في بولاق الدكرور

نجحت التحقيقات في كشف قضية رقم 2707 لسنة 2023 تفاصيل مقتل شاب سوداني الجنسية على يد شخصين إسماعيل. ع 27 سنة ومحمد.ش 26 سنة بعد أن استدرج المتهمان المجني عليه بأحد العقارات المملوكة للمتهم الأول، لسرقة مبلغ مالي منه في منطقة بولاق الدكرور.

قال المتهم "محمد.ش"، أمام جهات التحقيق: "يوم الواقعة إسماعيل كلمني المغرب، وقاللي تعالى لي أنا معايا الزبون وقصده على الولد السوداني عشان كان معاه دولارات".

وأكمل: "أنا قلتله تمام وبعدها بساعتين على الساعة 9 تقريبا لقيت إسماعيل جاي بالموتسيكل وراكب وراه واحد أسمراني وكان لابس سويتشيرت أو قميص أبيض وبنطلون جينز مش فاكر لونه بالظبط وقالي أنا هستناك جوه في الورشة ابقى حصلني فقلتله ماشي هخلص مع الرجالة وأجيلك لأني ساعتها كنت بشرب آيس مع الرجالة".

ويكمل المتهم: "إسماعيل المتهم الأول في القضية خد الولد السوداني وسبقوني على الورشة وأنا حصلتهم بعدها بحوالي ربع ساعة ولما روحت على الورشة بتاعة إسماعيل لقيتها مقفولة فكلمته على التليفون فقالي إنه قاعد فوق السطح بتاع بيتهم فطلعت السطح وساعتها إسماعيل كان بيلف سيجارة بودر، وسلمت على الراجل السوداني اللي كان معاه وقعدت ألف سيجارة حشيش ولما إسماعيل خلص لف سيجارة البودر اداها للواد السوداني فخدها منه ولما السوداني ولعها وخد منها كذا نفس بدأ يدوخ بس منمش زي ما كنا متوقعين إنه ينام ونقشطه لإني البودر بيخلي اللي بيشربه ينام".

وأضاف المتهم: "إسماعيل ساعتها كان متقله السيجارة وماليها بودر عشان الواد السوداني ينام على طول وبعدها بحوالي نصف ساعة إسماعيل عمل نفسه بيتكلم في التليفون وبيتمشى على السطح لحد ما جاب قالب طوب وجه من جمب الواد السوداني وراح ضربه بالقالب على دماغه من جنبه الشمال وساعتها الواد السوداني وقع على الأرض بس فضل صاحي برضو ولسه هيقوم يعافر معانا قام إسماعيل طلع المطوة من جنبه اليمين ونط فوق الواد وضربه حوالي 3 - 4 ضربات في صدره وجنبه الشمال، لحد ما قطع النفس خالص، وإسماعيل حرق جثته".