مفاجآت صادمة في تحقيقات قاتل زوجته بالنزهة بـ 27 طعنة

فجرت التحقيقات في القضية المتهم فيها حسن.أ 43 سنة بقتل زوجته باستخدام سلاح أبيض بسبب شكه في سلوكها وإثر مشادة كلامية بينهما أخرج سلاح أبيض وأنهى حياتها بمنطقة النزهة.

المتهم بقتل زوجته بالنزهة

واعترف المتهم خلال التحقيقات قائلا : أنا متجوز المجني عليها من 18 سنة وسافرنا مع بعض السعودية واشتغلنا هناك وحالتنا المادية كانت كويسة جدا، ورجعنا مصر ودخلت شراكة في بناء العمارة اللي أنا ساكن فيها دلوقتي ودخلت مع شريك في كافية تحت العمارة، وكان كل لما تحمل تسقط لفينا على دكاترة كتير مكناش لاقين حل للموضوع ده، وأنا كان نفسي يكون ليا ابن.

طفل صغير في الشارع

وأشار المتهم قائلا : من حوالي 6 سنين كده واحد صاحبي من عين شمس عنده محل كاوتش عربيات لقي ناس بيرموا عيل في الشارع فأخذه منهم وكلمني في التليفون وقالي إنه لقي عيل في الشارع وكان لسه مولود وهو عارف موضوع الحمل والتسقيط ده فقالي خده ربيه فخدته منه وروحت مكتب صحة عين شمس وخدت من ناس قدام المكتب إخطار ولادة روحت سجلته باسمي أنا وزوجتي المجني عليها على أنه ابننا وخدته ربيته وعاش معانا.

مشاكل وخلافات زوجية

وسرد المتهم : بعد كده حصلت ما بينا مشاكل بسبب أنها كانت تتضايق من أن في ستات بيكلموني بحكم شغلي في الكافيه علشان يحجزوا أماكن للمناسبات وكنت أوقات بضربها كانت بتغضب وبتروح لأهلها وبروح أرجعها وأول أمبارح حصلت مشكلة ما بينا وخنقتها ولقيتها أمبارح على العصر كده بتكلمنى بتقولي إنها هتروح عند أختها وتسيب البيت فأنا طلعت علشان أحاول أمنعها ومتمشيش فشدينا مع بعض في الكلام وأنا أتعصبت لقيت نفسي بجيب المطواة من الدولاب وروحت داخل عليها المطبخ وفضلت أخبط فيها لحد ما وقعت على الأرض غرقانة في دمها.

محكمة شمال القاهرة

قضت محكمة شمال القاهرة بمعاقبة المتهم حسن.بالإعدام شنقا وذلك لاتهامه بقتل زوجته بمنطقة النزهة ومعاقبة بالسجن المشدد 3 سنوات وغرامة 10 آلاف جنيه بتهمة تعاطي المواد المخدرة.

مستشفى الأمراض النفسية

وقررت المحكمة، خلال الجلسة السابقة، إيداع المتهم مستشفى الأمراض النفسية، لبيان مدى سلامة قواه العقلية.

وورد التقرير وتبين سلامة قواه العقلية، فيما كشفت التحقيقات أن المتهم والمجني عليها نشبت بينهما خلافات أسرية، واعتدى عليها بالضرب بسلاح أبيض، وسدد لها عدة طعنات أودت بحياتها.

الصفة التشريحية

وكشف تقرير الصفة أن المجني عليها مصابة بجرح ذبحي بالرقبة، إضافةً إلى عدة جروح قطعية بأماكن متفرقة بالجسم، إذ وصل عدد الطعنات إلى 27 طعنة.