«متخافش يا محمد».. رسالة قوية من عمرو أديب لـ صلاح بسبب الحرب الفلسطينية
وجه الإعلامي عمرو أديب رسالة إلى محمد صلاح نجم ليفربو الإنجليزي، بشأن الأحداث الجارية والحرب بين فلسطين وقوات الاحتلال.
وقال عمرو أديب في تصريحات عبر برنامجه "الحكاية" المذاع على قناة "إم بي سي مصر": "رسالة إلى محمد صلاح، الكبير دايما الناس بتتوقع منه فعل كبير، أنا عارف إنك ممكن تكون متضايق دلوقت ومش عارف تاخد قرار واضح، لكن الناس كلها شيفاك يا محمد إنك فخر العرب".
وتابع: "العرب محتاجينك، أنا عارف مشاعرك وقد إيه إنك إنسان محترم، وجواك مشاعر نبيلة جدًا تجاه إخوانا الفلسطنيين، وقد يكون هناك سياسة جوة النادي إن مفيش لاعب يعبر عن نفسه".
وشدد: "قد يكون ليك حسابات من الناس اللي حواليك، إن دا ممكن يعملك مشكلة، محمد أنت محدش يقدر يعملك مشكلة، أنت قوي وموهوب ومحبوب، ومحدش هيزعل إنك واقف جنب أهلك ودينك".
وواصل: " ودايمًا بيجي مواقف في الحياة بنحط في مواقف للاختيار، وأنت دلوقتي قدام الاختيار، وأن تأتي متأخرًا خيرًا من أن لا تأتي أبدًا".
وأوضح: "كلمتك جوة المجتمع اللي أنت موجود فيه بألف، والإعلام الإنجليزي فيه بعض التوازن، والمجتمع فيه عدد كبير من العرب والمسلمين والمثقفين".
واختتم: "إحنا محتاجين كلمتك يا محمد، الشباب مثلهم الأعلى فخر العرب، هذا هو وقت الكلام، تحدث حتى نراك، متخافش يا محمد، كلنا جنبك ومعاك، موهبتك وقدرتك هتخليك تعبر هذا الأمر، إحنا مستنينك".
