أحمد موسى لـ إسماعيل هنية: «شوف اللي بتقدمه مصر على الأرض وكفاية عبث»

قال الإعلامي أحمد موسى، إن حجم المساعدات التي دخلت إلى قطاع غزة حتى الآن قدرها 7 آلاف طن، منها 5000 كيلو من مصر والباقي مصدره 17 دولة و30 منظمة.

وأضاف خلال تقديم برنامج على مسئوليتي، المذاع على قناة صدى البلد: مش عاوزين حد يشكرنا، بنعمل ده عشان أشقائنا وعشان ربنا.

وأردف: يا حج إسماعيل هنية شوف اللي بتقدمه مصر على الأرض وكفاية عبث، مصر بس اللي بتعمل، وفي دول تتكلم وتهاجم ومبتعملش حاجة، وأنت لو قاعد في غزة مكنتش هاجمت ولا اتكلمت لأنك كنت شوفت مصر بتعمل أيه.

وأكمل: أنت فاهم دخول المساعدات سهل يا حج إسماعيل هنية؟!، ده المجرم نتنياهو مش عاوز يدخل كيلو أرز للداخل الفلسطيني وحزب الليكود لا يريد إقامة دولة فلسطينية.

وواصل: كنت أتمنى أن تكون مع أشقائك في غزة وتتولى إدارة وتنظيم دخول المساعدات وعلاج المصابين، مش بقولك تقوم بعمليات عسكرية أنت راجل بتاع سياسة، وساعتها كنت هتعرف مصر بتعمل إيه للأشقاء في فلسطين.

واستطرد: كفاياكم كلام على مصر في أي حتة، واللي عاوز يتكلم المواقف واضحة، وهيجي يوم والعدوان هيخلص ومصر حلته قبل كده، وهتحله إن شاء الله بإذن الله المرة دي وهتوقف العدوان، وبعد وقف إطلاق النار نبدأ نقول ولكن دلوقتي وقت الدعم مش الكلام.