حمو بيكا يرد على حسن شاكوش: «أنا مش عدوك»
حرص مؤدي المهرجانات حمو بيكا الرد على استياء زميله حسن شاكوش من عدم دعوته لحضور سبوع ابنته، إذ قال إنه اتصل به ووجد تليفونه مغلق، وأرسل الدعوة لمدير أعماله.
وتابع حمو بيكا في فيديو نشره على حسابه الشخصي على موقع التواصل الاجتماعي فيس بوك قال فيه: "حسن شاكوش زميلي وأخ ليا، وبيقولوا عدوك ابن كارك، وأنا يا ابني مش عدوك، أنت أخويا وعلى دماغي، وكلمتك كذا مرة تليفونك مقفول، وقابلت مدير أعمالك وقلتله بتصل بحسن وموبايله دايمًا مقفول، وقلتله إديله الدعوة، وقوله سبوع بنت أخوك يوم كذا، وطالما بلغت مدير أعمالك يبقى بلغتك، ولو كنت عاوز تيجي كنت جيت زي ما جيت فرحك".
واستكمل: "هعاديك في إيه يا حسن، ربنا ما يجيب عداوة بينا، سواء جيت أو مجتش كأنك جيت ونورتني وشرفتني، وفي فرحك هجيلك وهكون أول واحد واقف معاك علشان أنت مش عدوي، أنت أخ ليا، وعمر كمال عزمته وكلمته ومجاليش برضه هعمل إيه تاني.. أنا ماعدنيش العيب أنتم أخواتي وأصحابي وأنا كنت خير ليكم وسند وأنتم برضه سند ليا".
وكان مؤدي المهرجانات حسن شاكوش قد أوضح سبب عدم تواجده في سبوع ابنة حمو بيكا، إذ قال إن الأخير لم يدعوه، وتابع: "حمو بيكا معزمنييش على عقيقة بنته، وأنا مبتحركش من مكاني غير لما أتعزم، وبيكا معاه تلفوني لو عزمني كنت رحت".
