إمام عاشور يكشف كواليس انتقاله للأهلي.. وما دار مع الخطيب

كشف إمام عاشور لاعب الأهلي، كواليس انتقاله للأحمر، وأول اتصال من محمود الخطيب رئيس النادي معه.

وقال إمام عاشور، في تصريحات لبرنامج “اللعيب”، عبر قناة” mbc مصر”: “النادي الأهلي شرف لأي لاعب، أنا سعيد بوجودي داخله من أول يوم ليا في النادي اللعيبة كلها في ضهري وبيساندوني ويدعموني، وده اللي كنت محتاجه الفترة اللي فاتت من اللعيبة، مكنتش محتاج دعم غير من اللعيبة”.

وأضاف:” دعم لاعبي الأهلي ليا أمر يسعدني، كنت بنزل الملعب ممكن أموت نفسي عشانهم، وشرف لي اللعب في الاهلي وارتداء رقم كابتن محمد ابو تريكه وقالوا تقيل عليك ولكن ده شرف ليا”.

وتابع عاشور: “النجم الكبير كده بيتعرض لانتقادات، كهربا اخويا الكبير وبيدعمني وبيخرجني بره المشاكل وموضوعه زي موضوعي، مكنتش اعرف كهربا خالص وقت مباراة القمة الناس قالوا اننا اصحاب ووقتها مكنش يعرف ان كنت همشي”.

وأشار: ”مكنش في كلام مع الاهلي وخرجت من هنا للاحتراف، وكان في صعوبة بالنادي الدنماركي، ومعرفتش اتأقلم وحالتي النفسية كانت سيئه، وقررت افسخ العقد الاهلي متكلموش معايا الا لما رجعت مصر بعد الإصابة وتواصلوا معايا وعرفوا موقفي ورحبت بالانتقال للاحمر”.

واختتم: “قابلت كابتن الخطيب مرتين دائما يقولي ملكش علاقة ببرة الملعب ومتعاديش حد، وبيطالبني بالتركيز في التدريبات واول مكالمة بينا قالي ألف مبروك وانت جاي الأهلي حاجة كبيرة، وحفزني وقالي ركز في ماتشاتك بس”.