طه دسوقي يوجه رسالة شكر لصناع مسلسل «حالة خاصة»
حرص الفنان طه دسوقي على توجيه رسالة تعليقًا على نجاح مسلسله حالة خاصة، وذلك من خلال حسابه الشخصي على موقع التواصل الاجتماعي فيس بوك.
وكتب طه دسوقي في رسالته: "شكرا كلمة قليلة جدا على كم الحب والمباركات اللي جايالي منكم من أول عرض المسلسل واسف لو ملحقتش ارد على ناس كتير بس حابب أشكر أولا كل اللي سهل عليا إني أعمل شغلي وأسف لو هيبقى بوست طويل شوية شكرا لكوتش التمثيل نديم اللي اشتغلنا مع بعض على الدور شكرا للجمعية المصرية للتوحد ودكتورة داليا سليمان اللي ساعدوني أعرف أكتر وجاوبوني على أسئلة كتير جدا عن التوحد وقابلوني بناس كتير على طيف التوحد من مختلف المراحل شكرا عبدالله أشرف اللي قابلته في الجمعية وكان معايا في مرحلة التحضير وفادني جدا اني أتعرف عليه اكتر (بالمناسبة عبدالله دلوقتي شغال في تيم watch it) شكرا للصديقة الممثلة ملك ياسر اللي ساعدتني بمعلومات كتير عن التوحد وخاصة المرحلة اللي فيها نديم".
وتابع: "شكرا لصديقتي الدحيحة / مراتي نادين اللي دايما في ضهري وتحمست معايا وقعدت دورتلي على حاجات اشوفها وأقراها عشان اعرف معلومات اكتر، شكرا لسالي فايز ولكل فريق ginger، شكرا أستاذي واخويا الكبير احمد أمين اللي مترددش لحظة إنه يكون جنبي في أول حلقة من المسلسل واللي حقيقي من اكتر المشاهد اللي استمتعت بيها ثانيا شكرا لكل فريق العمل بداية من استاذ طارق الجنايني اللي إختارني وحملني مسؤولية اني اكون ضمن المسلسل ده.. مرورا بالمؤلف مهاب طارق اللي عمل حدوتة مهمة وسلط الضوء على فئة ناس كتير أوي متعرفش عنها حاجة وقرر إنه يضفر أحداثها بأغاني فرقة المصريين.. والمخرج عبدالعزيز النجار اللي أنا متأكد اني تعبته معايا وكل فريق العمل اللي ورا الكاميرا من مهندسة الديكور سالي الشامي والاستايلست فريدة فؤاد ومهندس الصوت عمرو عصام وصولا للمونتير اللي اشتغل على المشروع بحماس ميقلش عن أي حد فينا كريم سعد".
وأضاف: "شكرا لكل كرو التصوير على رأسهم استاذ / محمد عبد الرؤوف شكرا الأستاذة الكبيرة -مقاما مش سنا- غادة عادل على حبها واحترامها لشغلها ودعمها ليا في مسلسل زي ده شكرا ومبروك لزمايلي على مجهودهم هاجر السراج - وئام مجدي - احمد أزعر - حسن ابو الروس - على السبع - لينا إيهاب شكرا للعبقري هاني شنودة اللي ربط التجربة دي بالموسيقى بتاعته وبأغانيه وشرفنا كلنا إنه يحط عليها إسمه، شكرا تاني لكل حد كتب عن المسلسل أو بعتلي أو باركلي وأتمنى باقي المسلسل يعجبكوا.. من قلبي شكرا".
