بعد الهجوم الناري عليه.. أحمد سالم يدافع عن حازم إمام بعد رحيل فيتوريا
دافع الإعلامي أحمد سالم، عن حازم إمام عضو مجلس إدارة اتحاد الكرة المصري لكرة القدم، بعد الهجوم الضاري الذي يتعرض له بسبب روي فيتوريا المدير الفني لمنتخب مصر السابق.
وقال أحمد سالم، في تصريحات تليفزيونية عبر قناة "الشمس": "لماذا الهجوم على حازم امام، أنتم بتكرهوا أي حد يعمل حاجة، حازم إمام برنس في نفسه لا محتاج فلوس ولا ناقصه شهرة، وبيستفزني يقولك بيستغل منصبه في اتحاد الكرة، لا ده وَاجه شيك جدا جدا، والقنوات العربية بتتهافت عليه وبأرقام تغنيه عن وجع الدماغ في اتحاد الكرة”.
وتابع: "متكرهوش الناس في البلد، حازم إمام نفسه ينجح، يقولك فيتوريا مدربش منتخبات، طيب كيروش درب منتخبات عمل إيه؟".
وأضاف: "بقول لحازم ريح دماغك، الوضع وصل للبجاحة إن صحفي يقول هل حازم إمام يتحمل الشرط الجزائي لفيتوريا، ياسلام!!، هو المدرب اتمسك بمخدرات وحازم كان شريكه".
وأشار: "هو حازم رئيس الاتحاد ومسمعتش حد اتكلم على جمال علام ولا بركات ولا الدرندلي، اشمعنى حازم واقف في الزور؟، هو جاب مدرب كبير في أوروبا ولم يوفق".
وواصل سالم: "عمل إيه حازم وغلط وزعلك في إيه؟، علشان الهجوم المبالغ فيه، هو حازم اللي وضع جدول الدوري اللي على المزاج؟، هو نزل الأندية الجماهيرية درجه تانية وطلع أندية الشركات؟، وعمل اختبارات الناشئين وعلشان ابنك يلعب يدفع فلوس".
وأكمل: "حازم إمام هو اللي قال للعيبة متحترفوش وأي لاعب يحترف بنجري نجيبه، ولا هو مسئول عن التحكيم، كل شوية نهبش في حد وكأنه البعبع هو كان نفسه ينجح ومحققش النجاح الكافي".
واختتم: "نتمنى التوفيق لكابتن حسام حسن اللي لما هيخسر ماتشين الناس هتهاجمه والأسطوانات جاهزة، هو كان أخد بطولة علشان يدرب المنتخب، حسام نجم كبير وعنده النزعة الوطنية واللاعب المصري بيحب الشحن الأوفر والحماس".
