أسماء جلال: «حبيت وائل جسار وقولتله إننا هنتجوز»
تناولت الفنانة أسماء جلال تفاصبل عن حياتها الشخصية مشيرة إلى أنها أحبت شخصًا لعدة سنوات، لكن كان هذا الحب من طرف واحد، ولم تنجح هذه القصة.
كما كشفت أسماء جلال لقاء لها في برنامج «معكم منى الشاذلي» على قناة ON، قائلة: «وأنا صغيرة حبيت شخص ما من طرف واحد.. قعدت سنين كتير أوي بحبه بس هو مش عاوزني بإرادته، بس أموت وأعرف هو فين دلوقت».
وتابعت: «وائل جسار بحبه جدًا.. كنت الشخصية الملزقة اللي بحط صوره في كل حتة، وبعدين الموضوع تطور وبقيت غريبة الأطوار جدًا وبقيت أحضر حفلاته كلها، بقى لما يعمل حفلة أكون أول واحدة عارفه مكانها فين وأحجز ترابيزة كاملة ليا عشان أركز معاه.. وكنت ألبس فستان حتى لو الناس حواليا لابسة عادي عشان يشوفني.. مع إنه متجوز.. فمش فاهمة أنا كنت بعمل ايه».
وأضافت: «طبعًا ولا أخد باله مني خالص.. لحد ما في مرة أعتقد خاف مني وقتها، لأن روحت له كنت عاوزة أتصور معاه، فقلت له عارف إننا هنتجوز؟ قالي والله!!.. كنت صغيرة والله العظيم وقتها يا جماعة.. لسه بحبه بس مش بعمل زي زمان، وربنا يبارك له في مراته وولاده».
