بعد قليل.. أولى جلسات محاكمة المتهم بقتل صديقه في البراجيل

تنظر محكمة جنايات الجيزة المنعقدة بزينهم اليوم الأحد، أولى جلسات محاكمة المتهم بقتل صديقه بسبب خلافات سابقة في البراجيل.

وقال المتهم «حسام»، في بداية التحقيقات: «أنا هحكي لحضرتك من الأول خالص، اللي حصل بالضبط إني كنت خاطب واحدة اسمها (رحاب.ر) من 3 شهور بداية شهر 12 اللي فات على طول، والعلاقة ما بيننا كانت كويسة جدًا لغاية ما شهر 2 اللي فات ابتدى لقيت تصرفاتها معايا اتغيرت وطريقتها مابقتش حلوة خالص وبتكدب عليا في حاجات كتير، وساعات أقولها أروح معاكي في أي مكان ترفض مش زي الأول معايا، وابتديت الشغل مع (سيد بريك) في المغسلة قعدت معاه في فرح واحد صاحبنا من البلد من فترة كبيرة لغاية ما (سيد) قالي تشتغل معايا في المغسلة، قولتله تمام أنا هشتغل معاك وفعلًا ابتديت الشغل وأنا كنت خاطب».

وأضاف قائلًا: «وكنت بحكيله كل حاجة عني أنا و(رحاب) لما يكون ما بينا مشكلة، لغاية الأسبوع اللي فات لما ابتدى قبل شهر 3 على طول، لقيت (سيد)، صاحب المغسلة، بيقولي (رحاب) خطيبتك رافعة (بوست) على (الفيسبوك) بتقول فيه: (تم بحمد الله فشكلة خطوبتي)، أنا استغربت جدًا من طريقته معايا وقتها، وبعد كده لقيته يوم السبت اللي فات الموافق 2/3/2024 وإحنا الصبح لسه كنا فاتحين المغسلة علشان نبدأ شغل، لقيته بيقولي: (أنا رايح مع رحاب مشوار علشان هي اتصلت عليا)، أنا استغربت وقتها من اللي بيقولهولي وبعدين إيه علاقته بـ(رحاب) بالضبط».

واستطرد: «وبعدها وإحنا راجعين قولتله أنت إزاي بتكلم (رحاب) اللي في الأصل خطيبتي مش المفروض تستنى لغاية ما ننهي الموضوع ده وبعدين تتكلم معاها، رد عليا بالضبط (قالي بقولك إيه اللي بينكم وبين بعضكم، أنا مليش دخل فيه واللي اعمله ميخصكش يا حسام)، رديت عليه وقولتله إزاي يعني مش في بينا عيش وملح، لقيته بيرد عليا ويقولي (الملح داب والعيش كلته الكلاب)، فقولتله ده إزاي جه ياريس، قام سبلي الدين وشتمني بأبويا وأمي، رديت عليه الشتيمة على طول وسبتله الدين، قام هو واقف بالماكنة بتاعتي ونزل منها نزلت وراه لقيته بيشتمني تاني».