عادات تسرع من الشيخوخة.. تجنبيها

الشيخوخة ليست مجرد عملية طبيعية تحدث مع مرور الوقت، بل الشيخوخة بتتأثر بشكل كبير بعادات يومية صغيرة بنعملها من غير ما ندرك خطورتها.

تصرفات بسيطة نكررها كل يوم ممكن تسرّع ظهور التجاعيد وفقدان مرونة البشرة، حتى لو كنا فاكرين إنها بلا تأثير. فهم العادات دي والابتعاد عنها يقدر يفرق جدًا في شكل البشرة ويخليها أصغر سنًا وأكثر نضارة.

1: الإفراط في استخدام الهاتف

النظر المستمر للموبايل أو التابلت بيؤدي للي يُعرف بـ رقبة الهاتف، وهي انحناء الرقبة لفترات طويلة. الوضع ده بيجهد جلد الرقبة والفك وبيسرّع ظهور التجاعيد والترهلات.

الحل: حاولي ترفعي الموبايل لمستوى العين، ومتفضليش منحنية لساعات طويلة.

2: عدم شرب كمية كافية من الماء

ده تصرف يومي بسيط لكنه من أخطر أسباب الشيخوخة المبكرة.

نقص الماء بيخلّي البشرة جافة ويفقدها مرونتها، وبالتالي تبقى أكثر عرضة للتجاعيد.

الحل: شرب 8 أكواب ماء يوميًا على الأقل، وزيادة الكمية في الحر أو مع الرياضة.

3: قلة النوم

أثناء النوم الجسم بيجدّد الخلايا وبيفرز الكولاجين المسؤول عن مرونة الجلد.

قلة النوم بتخلّي البشرة باهتة ومتعبة وتسرّع ظهور الخطوط الدقيقة.

الحل: من 7 لـ 8 ساعات نوم يوميًا علشان بشرتك تستعيد نضارتها.

4: لمس الوجه باستمرار

فرك العينين أو لمس الوجه بيزود انتقال البكتيريا وبيسبب حبوب والتهابات، وكمان بيساهم في ظهور التجاعيد حول العين والفم.

الحل: قللي لمس الوجه واستخدمي مرطب مناسب لنوع بشرتك.