«عايز ارمي نفسي من البلكونه وبحلم بقتل ولادي».. شريف إدريس يعلن اعتزاله الفن
تفاجئ متابعين الفنان شريف إدريس، أنه قرر اعتزال الفن بشكل نهائي والسفر للخارج بسبب أنه لم يتلقى منذ فترة كبيرة أي عروض فنية جديدة، وأوضح أنه فكر في الإنتحار أكثر من مرة بسبب الأزمة المادية التي يمر بها.
وكتب على صفحته الرسمية عبر موقع التواصل الاجتماعي «فيس بوك» قائلًا: «بسم الله الرحمن الرحيم بعد ٣٥ سنه سعي وتعب وشقي في الوسط الفني قررت الإعتزال والابتعاد تمامًا وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد».
وأضاف: «ده قرار أخدته بعد ما الأمور وصلت في الوسط الفني لمرحله عبثيه وصلت إني بقيت بشوف بعض الزملاء بيشحتو الشغل علني علشان يشتغلو لأن الشغل بقي متقسم على ناس معينه فلو الأمور وصلت لكده أبعد أحسن، وحتي لما بيجي شغل بيتفرض عليك توافق باقل الفلوس وتخرج من الشغل مديون ومواقف مهينه زي ان شركة انتاج تعرض عليك اجر هو قيمة ربع اجرك والسبب انهم الميزانيه مصروفه عالديكور..طب خلو الديكور يمثل».
وتابع «إدريس»: «هحكيلكم موقف حصل معايا من أسبوع اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور كان هيجيلي جلطه بعد ماقفلت المكالمه ووافقت علشان انا محتاج اشتغل ومحتاج فلوس وماقدرتش استوعب الفكره بصراحه اني بعد العمر ده مضطر أدفع علشان اشتغل فاتصلت واعتذر وده الحال حاليا ان الامور بقت في ايد كاستينج دايريكتور..وده موقف من مواقف كتير مريت بيها لو حكيتها محتاجه كتاب مش بوست عالفيس».
وآشار: «فطالما الشغل بقي لازم يتدفعله وطالما الشغل بقي بالشحاته يبقي بلاش أحسن أنا طول عمري راضي الحمد لله بس حقيقي أنا وصلت لمرحلة اكتئاب وصلتني اني بقيت بنام احلم بكابوس اني بقتل عيالي وبقتل نفسي لأني وصلت لمرحله نفسيه وماديه اني بقيت مش قادر اربيهم ولا اصرف عليهم وانا عندي تلات اطفال بعبدهم عباده متخيلين حجم المسؤليه وبقيت مديون لطوب الارض».
وأكد: «حقيقي لو حد عنده فرصة سفر ليا هاكون شاكر ليه جداً وهيكون جميل في رقبتي لحد ما اموت لأن حقيقي انا مش قادر اعيش في البلد دي تاني انا حاولت اسعي في اي مجال تاني بس ماقدرتش ولو اتعرض عليا بطولات بعد البوست ده هرفضها لان البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله علي كل شئ».
واختتم شريف إدريس حديثه قائلًا: «همسح ابلكيشن فيسبوك من تليفوني لاني هنزل ابيع تليفوني اصلا فانا هاكون متاح اونلاين لحد بالليل لو حد عنده فرصة شغل وسفر ليا ومش معاه رقمي ياريت يجيبه من اي حد أنا مش محتاج طبطبه من حد انا محتاج فرصة سفر وشغل تخليني اعيش ولادي حياه كريمه وبس شكرا ليكم محبتي للجميع هاين عليا اقوم ارمي نفسي من البلكونه بعد ماوصلت اني اكتب البوست ده».
