ناصر ماهر: «سعيد بأول أهدافي مع منتخب مصر.. ومواجهة مالاوي المقبلة صعبة»
أعرب ناصر ماهر، لاعب منتخب مصر، عن سعادته بالفوز على مالاوي وتسجيل أول أهدافه بقميص الفراعنة، مؤكدًا أن عودته إلى صفوف المنتخب بعد فترة من الغياب تمثل له شعورًا مميزًا.
وقال ناصر ماهر، في تصريحاته عقب المباراة: «الحمد لله على المكسب وعلى أول هدف ليا مع المنتخب، كنت غايب بقالي فترة، وكان نفسي أكون موجود الفترة اللي فاتت، لكن الحمد لله التوقيت كان كويس إني أكون موجود دلوقتي».
وأضاف: «بشكر زمايلي اللي ساعدوني جوه الملعب إني أظهر بشكل كويس، وبشكر كابتن علي ماهر إنه اداني الفرصة إني أرجع تاني للمنتخب، وأنا مبسوط جدًا، ويا رب دايمًا نقدر نفرح الشعب المصري».
وتحدث لاعب المنتخب عن الأجواء داخل المعسكر، قائلًا: «الأجواء حلوة جدًا وكلنا مبسوطين، ومبسوطين طبعًا لصلاح، واللاعيبة كلها النهاردة أدت بشكل كويس، والنتيجة الحمد لله جيدة».
وتابع: «لسه بدري، وكابتن علي بيشتغل معانا الأسبوع ده، وبدأنا ننفذ حاجات في فترة قليلة جدًا، وأنا حاسس إن شاء الله إن الدنيا هتبقى أحسن خلال الفترة الجاية».
وعن مواجهة مالاوي المقبلة، شدد ناصر ماهر على صعوبة المنافس، قائلًا: «مالاوي مش فريق سهل خالص، وإحنا بنحترم كل الفرق وكل المنتخبات، وأظن الماتش هناك هيبقى صعب جدًا».
واختتم تصريحاته بالتأكيد على أهمية التركيز في المواجهة المقبلة، مضيفًا: «الناس سعيدة دلوقتي، وبعد كده نقفل ونركز في الماتش اللي جاي إن شاء الله».
