عمرو أديب يُطالب الحكومة بدعم القطاع الخاص
علق الإعلامي الإعلامي عمرو أديب على قرارات الحكومة اليوم قائلا: "أنا كمواطن عندي عدد من الملاحظات الأولى مقدرش أقول لك إن ما حدث شيء عظيم وإلا سأكون رجلا غريبا، ومحدش مبسوط النهارده، وأي طبقة من الطبقات اللي كلمتني النهارده قلقانين ومتضايقين، وأغلب دول العالم عندها نفس القلق والضيق والمشاكل، ومش عايز أطبل".
وأكمل أديب خلال برنامج "الحكاية" المذاع على قناة "إم بي سي مصر": "مقدرش أقول إن اللي حصل النهارده حلو وجميل، والملاحظة الثانية أنا كمواطن يهمني إني عرفت إن فيه أزمة بسبب الموجة التضخمية وزيادة الأسعار ولكن اللي يهمني كيفية إدارة الأزمة وهذا ما فعلته الحكومة اليوم وأدى إلى ارتفاع أسهم البورصة، ولكن إزاي نقدر نساعد بعض ونكمل لأن محدش عارف الأزمة الروسية الأوكرانية هتطول ولا لأ والأغنى مننا وعندهم احتياطيات بيعانوا من مشاكل.
وتابع أديب: "أنا شفت النهاردة الحزم الاجتماعية وتحديد سعر الخبز السياحي ورفع أجور الموظفين في الحكومة ودعم البورصة وده عظيم ولكن أرجوكم لا تنسوا المشغل الأول في مصر اسمه القطاع الخاص، والملايين الأكتر بيشتغلوا في القطاع الخاص وهل انتوا مش عايزين تعملوا لهم أي حزمة؟ لازم نعمل حزمة للقطاع الخاص حتى لا يلجأ لتسريح العمالة أو يفلس".
