فلوكس: أنا كنت من أسوأ الناس وعملت كل الموبقات «فيديو»

تضامن الفنان أحمد فلوكس، مع مطربي المهرجانات في أزمته الأخيرة مع نقابة المهن الموسيقية، قائلًا: "أنا بحب المهرجانات وبسمعها ولما يكون فيها كلام مش كويس المفروض ممنعش المطرب ولا أوقفه أخده أقومه وأعلمه وأخليه يكمل رسالة صحيحة طالما ليه جمهوره".

وعن رأيه في فيلم أصحاب ولا أعز، قال فلوكس، خلال حلوله ضيفًا ببرنامج "حبر سري" المذاع عبر فضائية "القاهرة والناس"، مع الإعلامية أسما إبراهيم، قائلًا: "طبعا الفيلم كله غلط واللي حصل كله غلط، تعاطف مع فئة معينة دي حريتك لكن متنشرهاش".

وتابع: "محدش يقول فيلم أصحاب ولا أعز عادي لأنه مش عادي، إحنا لينا قوانين، معقبًا: "أنا شوفت كام مشهد من الفيلم ومكملتوش لأني ممثل وفهمت المقصود من الفيلم إيه".

وأكمل: "الناس هاجمت أبويا على مشهد فيلم الراقصة والسياسي، ولم يكن هو قضية الفيلم لكن الناس هاجمته، مردفًا: "أنا مليش إني أنتقد منى زكي لكن هي خانها الاختيار".

وأردف: "أنا كنت من أسوأ الناس الموجودة في الدنيا وعملت كل الموبقات بس معملتهاش قدام الناس على الشاشة وتوبت وطلبت من ربنا يسامحني ".

وحل النجم أحمد فلوكس ضيف الإعلامية أسما إبراهيم في حلقة خاصة من برنامج "حبر سري" كشف فيها حقيقة الخلاف بينه وبين محمد رمضان وباسم سمرا وسر الهجوم عليه بعد فيلم الممر ورد على شائعات تعدد زيجاته وحقيقة مقاطعته لوالده وغيرها من الأسرار.