رسالة جديدة من حمو بيكا لهاني شاكر: كفاية تنمر عليا

نشر مؤدي المهرجانات حمو بيكا على حسابه بموقع التواصل الاجتماعي فيس بوك صورة له من لقائه مع الإعلامية أسما إبراهيم في برنامج حبر سري، وعلق عليه برسالة للفنان هاني شاكر وللمتنمرين عليه.

وقال بيكا: يا جماعة ياريت نفهم ان انا موجوع وتعبان ، كفاية تنمر عليا، اتنمر عليا مرة واتنين وتلاتة، ولسة فيه ناس بتتنمر عليا، بتتنمروا عليا لحساب مين؟ أنا بني آدم زي زيكم والله.

وتابع: "الأستاذ هاني شاكر حضرتك كنت في ندوة واتنمرت عليا، وأنت أخويا الكبير وأنا مسامح والله بس كفاية بالله عليك، أنا أة مش بعرف أقرأ وأكتب بس ربنا خلقلي قلب أحس بيه، كفاية تجرحوني، مش كل واحد يبقى عنده سلطة يتحكم في البشر..

وأضاف: "أنا 5 سنين بعاني وبعافر بس هما شايفين إن احنا مبسوطين وفرحانين، لا أنتوا اللي مبسوطين وانتوا اللي معاكم ومعاكم كتيييير وعندكم كتيييير بس عمرنا ما بصينالكم .. هو ليه لما يكون معايا حاجة حد يبصلي فيها وعايز ياخدها؟!، ده غير مرضي اللي بدفعله في الشهر كتير أوي".

وقال: "حسوا بيا، لو غلطت في حاجه تعالي وحاسبني وعلمني الصح من الغلط.. فاتح بيت وعندي أسرة وعندي مسؤوليات كتير محدش يعلم بيها إلا ربنا،، أرجوكم كفاية".

واختتم رسالته قائلاً: "ياريت تحكموا بينا بالعدل زي ما ربنا سبحانه وتعالى بيقول: "وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ".. وكفاية تنمر عليا وافتكروا كلام ربنا: "يَا أَيُّهَا الَّذِينَ آمَنُوا لَا يَسْخَرْ قَوْمٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ".. وفي النهاية شكراً لكل حد بيدعمني وبيحبني".