«عضني في منطقة حساسة».. رحمة حسن تكشف تفاصيل هجوم كلب شرس عليها
كشفت الفنانة رحمة حسن، عبر حسابها على موقع الصور العالمي «انستجرام»، عن تفاصيل تعرضها لعضة كلب في منطقة حساسة أثناء تجولها في الشارع بجوار منزلها.
وقالت رحمة حسن، في منشور لها: «امبارح الساعه ١١ بليل كنت نازله اجيب حاجه من السوبر ماركت جمب البيت ،وكنت ماشيه علي الرصيف وكان في عربيه بتركن جمبي عادي ، فجاه الباب اتفتح ولقيت كلب (جيرمن شيبرد) تقريبا مَش متاكده اوي، بيهجم عليه بكل قوته».
عضني في منطقة حساسة
وأردفت: «طبعا حاولت اجري لكن للاسف الكلب كان قوي وشرس ووقعني علي الارض، حاولت اقوم واجري وصاحبته حاولت تشده، بس فك الليش بتاعه، وعضني عضه كبيره وغويطه بنابه في منطقه حساسه».
وأكملت رحمة: «صاحبة الكلب كتر خيرها اخذتني فورا علي مستشفي امبابه، ادوني حقنه تطعيم الكلب ولسه فاضلي ٤ هاخدهم خلال شهر، بس المشكله ان من امبارح الجرح بينزف دم كتير، وانا طبعا خايفه ومصدومة، وتعبانه وعندي تروما من امبارح».
كلب شرس
وأكملت الفنانة: «اللي واجعني أكتر اني مَش عارفه اتصرف ازاي، خصوصا اني اكيد مَش عايزه الكلب يتاذي، بس كمان مَش عايزه اي انسان كمان يتاذي ويتعض ويتبهدل في الشارع زيي، انا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه».
وفجرّت رحمة مفاجأة قائلة: «امبارح صاحبت الكلب قالتلي متخافيش هو عض ولادي قبل كدا وتمام محصلش حاجه! طبعا انا اتصدمت لما عرفت انها مَش اول مره الكلب يعض حد ومع ذلك هي سايباه عادي في الشارع منغير كمامه أو حد قوي يمسكه.. بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسؤول مسؤلية كامله عنه ويحاسب علي اهمال مسؤليته ، خصوصا لو اهماله تسبب لشخص تاني في اذي بدني يحتاج اكتر من ٢١ يوم علاج واذي نفسي ماعرفش هايحتاج قد ايه عشان يخف .
واختتمت رحمة قصتها المؤلمة بقولها: «أنا كنت بحب انزل احط اكل ومايه للكلاب والقطط تحت البيت، دلوقتي انا حقيقي مرعوبه اقرب منهم وخايفه جدا».
طمأنة الجمهور
وفي منشور لاحق على واقعة روايتها، قالت رحمة حسن: «أنا متشكره جدا لاهتمامكم ولكل الناس الي كلمتني تطمن عليه واسفه اني ماقدرتش ارد علي معظم الناس لاني كنت تعبانه ومش قادره اتكلم، انا رحت المستشفي النهارده وكشفت عند جراح متخصص وهو غير علي الجرح وعمل الازم والحمد لله طمني، وقالي اتابع معاه الفتره الجايه واني هاكون كويسه انشاء الله والجرح هاياخد وقته وهايخف».
وأضافت: «وبالنسبه للكلب فاحنا اتكلمنا مع صاحبته وطلبنا منها توديه مركز تاهيل وتدريب علشان تعدل سلوكه ، وتبعت لنا الورق الرسمي الي بيثبت انها ودت الكلب فعلا ، والا هاعمل محضر .. وساعتها الكلب الي هايتضر ، ودي حاجه ماترضيش حد وهي كانت متفاهمه جدا ووافقت، وقالت انها هاتعمل كدا اول الشهر الجاي ، علشان اخوها الي هايوديه ويتولي مسئوليته، الحمد لله انا كويسه والكلب كويس، واتمني ان صاحبه الكلب تصدق في كلمتها وتودي الكلب فعلا مركز تعليم ويبقي كويس».
