رحمة حسن الأكثر بحثًا بعد تعرضها لهجوم شرس من كلب

تصدرت الفنانة رحمة حسن، تريند جوجل ومواقع التواصل الاجتماعي، بعدما أعلنت من خلال حسابها الرسمي عبر موقع الصور الشهير «إنستجرام»، أنها تعرضت لهجوم شرس من كلب ضخم في الشارع، مما نتج عنه الكثير من الإصابات في أماكن متفرقة من جسدها.

رحمة حسن تتعرض لهجوم من كلب شرس

وكتبت: «امبارح بالليل الساعة 11 كنت نازله أجيب حاجه من السوبر ماركت جمب البيت، وكنت ماشية على الرصيف وفي عربية بتركن جمبي عادي، وفجأة الباب اتفتح ولقيت كلب جيرمن شيبرد تقريبًا مَش متأكدة أوي بيهجم عليا بكل قوته».

نقل رحمة حسن للمستشفى

وتابعت رحمة حسن: «طبعًا حاولت أجري لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضه كبيره وغويطه بنابه في منطقة حساسة، صاحبة الكلب كتر خيرها أخذتني فورا على مستشفي إمبابة، ادوني حقنه تطعيم الكلب ولسه فاضلي 4 هاخدهم خلال شهر، بس المشكلة إن من إمبارح الجرح بينزف دم كتير».

وأضافت رحمة حسن: «امبارح صاحبة الكلب قالتلي متخافيش هو عض ولادي قبل كدا وتمام محصلش حاجة طبعًا أنا اتصدمت لما عرفت إنها مَش أول مرة الكلب يعض حد ومع ذلك هي سايباه عادي في الشارع من غير كمامه أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسؤول مسئولية كاملة عنه ويحاسب علي إهمال مسؤوليته، خصوصًا لو إهماله تسبب لشخص تاني في أذى بدني يحتاج أكتر من 21 يوم علاج، وأذى نفسي ماعرفش هايحتاج قد إيه عشان يخف».

رحمة حسن: أنا مصدومة وخايفة

واستكملت رحمة حسن: «أنا طبعا خايفة ومصدومة وتعبانة وعندي تورم من امبارح، واللي واجعني أكتر إني مَش عارفه أتصرف إزاي، خصوصًا إني أكيد مَش عايزة الكلب يتأذي، بس كمان مَش عايزة أي إنسان كمان يتأذي ويتعض ويتبهدل في الشارع زيي، أنا كنت بشوف الكلب ده دائمًا مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه».

رحمة حسن تطمئن جمهورها

وحرصت الفنانة رحمة حسن، أن تطمئن جمهورها على تطورات حالتها الصحية بعد هذه الواقعة، موضحة أنها اتفقت مع صاحبة الكلب أن ترسله إلى مركز تدريب وتأهيل، حتى لا يتكرر هذا الموقف من جديد مع أشخاص آخرين.

رحمة حسن تكشف تطورات حالتها الصحية

وكتبت: «أنا بشكركم جدًا لاهتمامكم ولكل الناس اللي كلمتني تطمن عليا، وآسفة إني ماقدرتش أرد على معظم الناس لأني كنت تعبانة ومش قادرة أتكلم، أنا رحت المستشفى النهاردة وكشفت عند جراح متخصص، وهو غير على الجرح وعمل اللازم والحمد لله طمني، وقالي أتابع معاه الفترة الجاية، وإني هاكون كويسه إن شاء الله والجرح هاياخد وقته وهايخف».

وتابعت رحمة حسن: «بالنسبة للكلب فاحنا اتكلمنا مع صاحبته وطلبنا منها توديه مركز تأهيل وتدريب علشان تعدل سلوكه، وتبعت لنا الورق الرسمي اللي بيثبت إنها ودت الكلب فعلًا، وإلا هاعمل محضر وساعتها الكلب اللي هايتضر، ودي حاجة ماترضيش حد، وهي كانت متفاهمة جدًا ووافقت وقالت إنها هاتعمل كدة أول الشهر الجاي، علشان أخوها اللي هايوديه ويتولى مسئوليته».

آخر أعمال رحمة حسن

وعلى صعيد آخر، شاركت رحمة حسن، كضيفة شرف ضمن أحداث مسلسل «ملف سري» الذي عرض على شاشة قنوات «Cbc» في الموسم الرمضاني، وشارك في بطولته كوكبة من النجوم منهم: ماجد المصري، ميرهان حسين، عائشة بن أحمد، شيرين، محسن محيى الدين، نضال الشافعي، كارولين عزمي، صبا الرافعي، وغيرهم، وهو من تأليف محمود حجاج، وإخراج حسن البلاسي.