«أنا مبرأتش حد».. تعليق صادم من زوج قاتلة أطفالها بالدقهلية على الواقعة - فيديو

كشف والد أطفال الدقهلية الثلاثة الذين قتلوا على يد والدتهم، تفاصيل الحوار الأخير الذي دار بينه وبين وزجته، مؤكدًا صدمته من التصرف الذي قامت به.

وقال محد أشرف، زوج قاتلة أطفالها بالدقهلية، في تصريحات تليفزيونية: "أنا مبرأتش ولا اتهمت، أنا قلت اللي أنا أعرفه عن الزوجة، واللي أعرفه عنها كل خير، لكن اللي حصل كان بالنسبة ليا مفاجأة".

وأضاف الزوج: "أنا قلت كل اللي أعرفه، مكنش عندي مقدمات ولا تفسير، إحنا متجوزين بقالنا 11 سنة، ومكنش في أي مقدمات، لأي مرض نفسي أو مفاجأة، بالعكس مفيش أي حاجة، لو كنت حسيت بأي حاجة كنت نزلت فورًا من السفر".

وتابع: "إحنا متكلمين يوميها بالليل، وقالتلي هات هدايا واشتريت كل اللي هما عاوزينه، وخلاص أنا كنت نازل بعد أسبوعين تقريبًا، وكنا بنحضر للنزول يعني مع بعض، مكنتش أتوقع أبدًا، الموضوع يوصل لكده، إيه ده؟، حتى أنا مصدقتش إنها ممكن تكون كتبت، لولا إني عارف خطها أنا مكنتش صدقت".

وأكمل في حديثه عن ابنه أحمد: "أحمد اتأخر في الكلام شوية، متكلمش إلا من سنتين لثلاثة سنوات، ومن أشطر الطلاب في المدرسة، وموضوع التوحد اللي انتشر على الفيسبوك، غلط لأن أحمد كان طبيعي جدًا.. آه مكنش عنده مكر الأطفال لكن كان طبيعي خالص".

واختتم حديثه: "أنا مبرأتهاش قدام النيابة، والنيابة بتقولي تفسير حضرتك إيه للي حصل؟، قولت تفسيركم إنتم للي حصل، أنا مكنتش موجود، قالوا إن كل الأدلة تشير إنها هي اللي عملت كده، فأنا مبرأتش حد، اللي بيبرأ أو يدين هو المحكمة، وأنا شهدت بما علمت، هي مش بتتكلم وفي الرعاية المركزة وممنوع عنها الزيارة، كانت مطيعة جدا وبتحب العيال جدا ومحترمة جدا، فيها كل الصفات تقريبا الحلوة".