تامر أمين: «مطلوب من كل مواطن ياخد حباية ضغط بسرعة» - فيديو

سخر الإعلامي تامر أمين، من خسارة المنتخب المصري أمام نظيره الإثيوبي بتصفيات كأس الأمم الأفريقية، قائلا: "كل اللي عنده دواء للضغط ياخد حباية بسرعة، المباراة انتهت بفضيحة".

وأضاف أمين، خلال برنامج "أخر النهار" المذاع على قناة "النهار" اليوم الخميس، قائلا: "اللي حصل النهاردة فضيحة، إثيوبيا أخدتنا غسيل ومكوة 90 دقيقة"، معقبا: "إزاي فرقة مش موجودة في التصنيف تعمل كده في منتخب مصر، والله أنا معرف جون إثيوبيا كان لابس إيه النهاردة".

وتابع: "الحمد لله إن صلاح كان مصاب وملعبش عشان اسمه وسمعته، بدل ما يتلطش التلطيش اللي اتلطشناه إحنا النهاردة"، مردفا: "لاعبية إثيوبيا كانت ضاغطة علينا وكابتن إيهاب بيواجه الضغط ده بكركديه".

وتابع: "كيروش ده بطل، ومكانش لازم يمشي، ده عمل من الفسيخ شربات، علشان يوصل بالفريق ده لنهائي أمم إفريقيا وملحق التأهل لكأس العالم، بالفريق مستواه كده، ده مدرب عظيم، لكن إيهاب جلال لا يمتلك أي إنجازات يستند عليها".

وخسر منتخب مصر الأول بقيادة إيهاب جلال، مباراة إثيوبيا بنتيجة 2-0، والتي أقيمت اليوم الخميس في مالاوي ضمن الجولة الثانية لتصفيات بطولة كأس الأمم الأفريقية.

وسجل هوتيسا هدف التقدم لإثيوبيا في الدقيقة 21 من عمر الشوط الأول، قبل أن يضيف شميلس بيكلي الهدف الثاني في الدقيقة 40.

بهذه النتيجة يرتفع رصيد إثيوبيا إلى 3 نقاط، بينما يتوقف رصيد منتخب مصر عند 3 نقاط من فوز وحيد على غينيا في الجولة الأولى.