بعد حملة الطفلة «رقية».. تامر حسني وخطة «المليون أخ» لمساعدة المرضى غير قادرين
أعلن الفنان تامر حسني، عن دعمه للأطفال غير القادرين الذين يعانون من مرض ضمور العضلات الشوكي، وذلك بعد مناشدة اليوتيوبر الشهير حسين الجوهري.
وكتب تامر حسني، عبر حسابه الرسمي بموقع التواصل الاجتماعي "فيسبوك":" يا حسين يا حبيبي انا معاك و بدعمك و بدعم حملتك الإنسانية السامية وسلامي لصديقي و حبيبي استاذ خيري رمضان ".
وأضاف "حسني":" عندي فكره اتمنى رعايتها ودعمها من أجل كل مريض، فكره مش هتخلي مريض واحد في مصر يمد يده لأحد ".
وتابع تامر حسني:" لو مليون مصري اشترك فيها هنحل أزمة الأمراض المكلفة في مصر كلها، مليون مصري بس من الـ ١٢٠ مليون مصري هيتطوعوا على حساب معين للتبرع".
وواصل: " وهيكون في لجنة مسؤولة من جهة رسمية مسؤولة في الدولة بتقيم الحاةه مادياً والمليون مشترك دول هيكونوا بيتبرعوا بشكل دائم كزكاة عنهم وعن أولادهم لخدمة مجتمع كامل ".
وتابع "تامر": " ممكن نسميها مثلاً صفحة المليون أخ، كل ما تظهر حاله محتاجه رقم صعب، الصفحه هتدرسها وتعلن عن الحاله وتكلفتها، التبرع هيبقى في حدود من ٢٠ إلى ٤٠ جنيهاً، حسب الحاله بس ساعتها أول ما هنعلن هنجمع الفلوس في ثانيه لكل المحتاجين ".
واستكمل تامر حسني:" كل المقتدرين اللي ربنا هينور قلوبهم و هيشتركوا في الحساب ده، مش هيحسوا انهم دفعوا حاجه بس هينقذوا حياة أطفال كتير وناس كتير محتاجة".
وأضاف:" ومين عارف يمكن الفكره دي تخلي مفيش ولا واحد مريض في مصر مش لاقي يتعالج و جايز المليون مشترك يكتروا".
واستكمل تامر حسني:" والله والله والله دي فكره بسيطة مش هتكلف حد بس هتخدم ناس كتير، هتخدم بلد، هتخدم كل المحتاجين ونخليهم ميمدوش أيديهم لحد يكسفهم".
اختتم تامر حسني، قائلا:" ربنا خلقنا عشان نساعد بعض و زي ما علمنا رسولنا الكريم، خير الناس أنفعهم للناس، يعني ربنا بيحب الناس اللي بتنفع الناس وأي صدقة بتخرج من أي حد مستحيل تنقص ماله بالعكس هيضاعفها ربنا في رزقه وهيكرمه ويطهره ويرفع عنه بيها، يارب الفكره دي تتحقق ".
