بعد السخرية منها.. أمينة شلباية: «بكره يعرفوا إني صح»
ردت خبيرة الموضة والإتيكيت، أمينة شلباية، على انتقاد البعض للفيديوهات التى تقدمها حول تعلم طرق الأكل الصحيح للطعام والفاكهة، وكيفية الجلوس أو الوقوف.
وقالت شلباية، فى مداخلة هاتفية لبرنامج "كلام الناس"، المذاع على قناة إم بى سى مصر: "طول عمرى بقدم إتيكيت فى البرامج بتاعتى، لكن مكنتش ببرزها أوى، ومش بالصورة اللى أنا بعملها، قولت خلينى أركز أكتر عليه".
وأضافت: "لكن لقيت السوشيال ميديا اتقلبت، الناس بتشوف بس الحاجات دى، لكن فى ناس كتير بتشجعنى خاصة الأمهات بتقولى كملى، وبناتى بقت تتفرج، ويستفادوا".
وتابعت: "الموضوع دائما بيبدأ بالشكل ده بعدين بيتقبلوا، ولما الواحدة يكون عندها ثقة فى نفسها وإن اللى بتقوله صح، متتهزش أبدا".
وأكملت: "الوعى هنا قليل، فهما معليهمش لوم، زى لما أنا بدأت فى الاهتمام بالشعر والمكياج، ناس كتير تقولى هو أنتى طول النهار فاضية".
وواصلت: "دلوقتى الناس بتكلمنى بنفس لغتى ونشر الفيديوهات دى مصلحة للناس، وعدم الوعى هيقل، وأنا بضحك معاهم، مش بتهز خالص، وبقول بكره هيعرفوا شوية بشوية، وفى يوم من الأيام هنوصل".
