جمعت بين زوجين في المقطم .. المتهمة تكشف تفاصيل مثيرة أمام النيابة
كشفت ربة منزل في اتهامها الجمع بين زوجين في المقطم عن تفاصيل مثيرة، خلال جلسات التحقيق معها أمام النيابة العامة، حيث أوضحت أن خلافا حدث بينها وبين أشقاء زوجها وتركت الأقصر لتذهب إلى شقة شقيقتها وتقيم معها بالمقطم؛ حيث اتهمتهما بإصدار وثيقة طلاق لها والزواج من أخر مستغلين عدم قدرتها على الكتابة والقراءة.
وجاء في نص أقوال المتهمة الثانية وتدعي نفيسة. ح "29 سنة "
س: ما قولك فيما هو منسوب إليك من أنك متهمة بارتكاب جريمة الزنا بالاشتراك مع المتهم عبد المنصف. أ ؟
ج: الكلام ده محصلش
س: ما الذي حدث إذن وما هى ظروف ضبطك وإحضارك وعرضك علينا؟
ج: اللي حصل إنه حصل خلافات بيني وبين إخوات زوجي وبعد كده سبت الأقصر في شهر فبراير اللي فات علشان ابعد عنه وجيت القاهرة اقعد عند اختي ام هاشم بمساكن المقطم ولما كنت قاعدة عندها قالتلي هي وجوزها شحات ان جوزي عبد النبي طلقني وطلعولي قسيمة طلاق ووروهالي، وبس انا مش بعرف اقرا ولا اكتب وبعدين قالولي مين هيخلي باله منك ومن عيالك ويصرف عليكو، وقالولي اتجوز عبد المنصف علشان ياخد باله مني ومن عيالي وبعد كده اجرلي شقة في بلوك 178 مساكن العبد، وفي شهر يونيو اللي فات قابلت عبد النبي في رمسيس واعطاني فلوس وطلعت معاه فندق ومش فااكرة اسمه وساعتها عاشرني معاشرة الازواج وبعد كده سبته ورجعت عند اختي، وامبارح اتفاجئت بعبد النبي بيخبط علي بابا الشقة بس انا مكنتش اعرف انه هو اللي بيخبط مردتش افتحله ولما كلمت اختي قالتلي صوتي ولمي عليه الناس وبعد كده لقيت الحكومة بتخبط علي الباب ففتحتلهم ونزلت وروحت معاهم علي بيت اختي وبعد كده هددوني انا ومنصف بعد ما جاب عقدين الجواز العرفي اللي احنا كاتبينهم وودونا القسم.
س: متي وأين حدث ذلك؟
ج: الكلام ده حصل بتاريخ 22 يوليو 2022 الساعه 2 صباحا في المقطم.
س: من كان برفقتك آنذاك؟
ج: أنا كنت في الشقة لوحدي ومعايا ولادي الاثنين واسمهم عمر وحمدي.
س: ما تعليلك بالقبض عليك؟
ج: انا معرفش هم قبضوا عليا ليه.
س: متي حدثت واقعة طلاقك من المدعو عبد النبي؟
ج: اختي وجوزها وروني قسيمة الطلاق في شهر فبراير اللي فات.
س: من هو القائم على إبلاغك بها تحديدا؟
ج: اختي وجوزها
س: هل من ثمة شهادة قيد طلاق لديك؟
ج: أنا معرفش مين الشهود
س: هل تقابلتي مع زوجك الاول عبد النبي؟
ج: ايوة انا قابلته في شهر يونيو اللي فات
س: هل قام سالف الذكر بمعاشرتك معاشرة الأزواج عقب علمك بطلاقه لك ؟
ج: أيوة.
س: ومتي وأين حدث ذلك؟
ج: الكلام ده حصل في شهر يونيه اللي فات في فندق برمسيس معرفش اسمه.
س: ما تعليلك لقيامك بذلك وأنتي علي علم بطلاقه لك؟
ج: علشان أختي وجوزها أجبروني على كده.
س: ما الذي أخبرك به كلا من شقيقتك وزوجها؟
ج: هما قالولي روحي قابلي عبد النبي لما اتصل بيا أروح أشوفه.
س: متي وأين قمت بالزواج من المدعو عبد المنصف؟
ج: أنا اتجوزته في شهر فبراير اللي فات
س: أين كنت تقيمين فترة زواجك من عبد المنصف؟
ج: عبد المنصف أجرلي شقة اللي أنا عايشة فيها دلوقتي
س: وما هي ظروف تقابلك مع عبد المنصف؟
ج: أنا أعرفه علشان هو قريب عبد النبي وانا كنت قاعدة ومع عبد النبي في الأقصر
س: وهل قام زوجد عبد النبي بتطليقك؟
ج: ايوة
س: وهل الطلاق بإذن أم رجعي؟
ج/ بإذن
س: وهل تم الطلاق رسميا علي يد مأذون؟
ج: أيوة كان رسمي علي يد مأذون
س: وهل قام زوجك عبد النبي بردك؟
ج: أيوة
س: وهل تم الرد رسميا علي يد مأذون؟
ج: أيوة هو ردني رسمي عند مأذون
وتلقت غرفة عمليات شرطة النجدة بلاغًا من عامل يفيد بضبط زوجته في أحضان عشيقها داخل شقة مستأجرة في منطقة المقطم، وانتقل رجال المباحث لمكان الواقعة.
وتحفظ رجال المباحث على ربة منزل وعشيقها، وبسؤال المبلغ أفاد أنه ضبط زوجته داخل شقة مستأجرة بدائرة القسم.
وبمواجهة ربة منزل وعشيقها، قالت الأولى: “مش عشيقي أنا متجوزاه عرفي”، وتم اقتياد المتهمين إلى ديوان القسم وتحرر محضر بالواقعة وتولت النيابة العامة التحقيق التي أمرت بحبسهما 4 أيام على ذمة التحقيقات.
